Баҳрайнлик Маҳмуд Абдулраҳмон: "Андижон" ҳам, "Ал-Халдия" ҳам бир-бирини яхши билмайди"

ОЧЛ 2 га қуръа ташлаш маросимида олдин хабар берганимиздек, баҳрайнлик таниқли собиқ футболчи Маҳмад Абдулраҳмон иштирок этган бўлиб, айнан у иккинчи саватчадан “Андижон”ни “В” гуруҳидан ўрин эгаллаганини эълон қилди ва бизнинг рақибларимизни аниқлаб берган.

Шунингдек, бу гуруҳда Баҳрайннинг “Ал-Халдия” жамоаси ҳам борлигини эслатиб ўтиш лозим.

Мухлислар ёдида бўлса, Маҳмуд Абдулраҳмон фаолияти давомида бир неча бор Баҳрайн терма жамоаси сафида Ўзбекистон термасига қарши тўп сурган.

“Андижон” матбуот хизмати эса Абдулраҳмондан интервью олди.

- “В” гуруҳи ҳақида нима деган бўлардингиз?

- Осон гуруҳ эмас. Ҳамма гуруҳдан енгил бўлгани йўқ. Балки “Андижон”ни кўпчилик билмаса керак. ОЧЛда янги жамоа. “Андижон” ҳам, “Ал-Халдия” ҳам бир-бирини яхши билмайди. Гуруҳдаги тўрттала клубга ҳам қийин бўлади. Бир-бирини билишмаса жамоаларга янада қийин кечади. Ким ютишини айтиш осон эмас. Барча жамоаларга омад тилайман.

- ОЧЛ 2 да сиз учун энг қийин ва осон гуруҳ қайси?

- Менимча, мени жамоам жой олган “Муҳаррақ” гуруҳи энг қийини. Чунки “Ал-Васл”ни ҳам яхши ўйинчилари бор. Эронни “Истиқлол”и номдор жамоа. “Ал-Муҳаррақ” ҳам кейинги босқичга чиқишга курашади. “Ал-Виҳдат” ҳам қийин рақиб. Осон гуруҳ қайсилигини билмайман. Балки “Андижон”ни гуруҳи осонроқдир ёки “Ал-Насср жой олган гуруҳ бўлса керак. Чунки улар “Гоа”га қарши ўйнайди. Менимча, шу осони.   

- Ўзбекистон терма жамоасига қарши илгари ўйнагансиз. Терма жамоамиз илк бор мундиалга чиқди. Футболимизни кузатиб боряпсизми?

- Ва ниҳоят, Ўзбекистон терма жамоаси янада қаттиқ ишлаб, жаҳон чемпионатига чиқишни уддалади. Бундан мағрурланаман. Чунки Ўзбекистон Осиё қитъасида жойлашган ва бунгача ҳам бир неча бор мундиалга яқин келганди. Ишончим комилки, Ўзбекистон термасининг даражаси ўсиб бормоқда. Билишимча, лигаси кучайиб боряпти. Шу боис миллий терма жамоаси борган сари яхши кетяпти ва мундиалга бежиз чиққани йўқ. Энди бўлса, “Андижон” Баҳрайн, Қатар, Туркманистон клублари билан ўйнайди. Ўзбекистоннинг ҳамма клублари қийин. Барчаларига омад тилайман.

- Игнатий Нестеровга олис масофадан гол урганингиз ёдимизда. Терма жамоамизга қарши учрашувларда қайси баҳс кўпроқ хотирангизда сақланиб қолган?

- Ўзбекистонга борганда Баҳрайн учун барча ўйинлар қийин бўлган. Чунки кучли мухлислари бор. Об-ҳавоси ҳам форс кўрфазига ўхшамайди. Менга ёққан энг яхши ўйин ўша жарима зарбасидан урган гол. Ўша уч очко бизга кейинги босқичга чиқишимизга ёрдам берган. Ўша голни уришимда мени омадим келган. Лекин охир-оқибат Ўзбекистон - бу Ўзбекистон. Осиёда ўйнаганида Ўзбекистонни кўп клублари кучли. Миллий терма жамоаси ҳам кучли. Шундай жамоага гол урганимдан ўзим омадлиман деб ҳисоблайман.