"Атлетико" президенти Симеоне нима учун кўп йиллар давомида жамоани бошқараётгани ҳақида гапирди
- 8-январ, 23:31
- Bilolbek Imomov
- 0
- Футбол
"Атлетико" президенти Энрике Сересо Диего Симеоненинг клубдаги кўп йиллик фаолияти ҳақида фикр билдирди.
"Матрасчилар" раҳбаридан нима учун "Реал"да 9 нафар мураббий алмашган (Анчелотти ва Зидан клубда икки мартадан ишлагани учун 7 нафар ҳисобланади), "Атлетико"да эса доим бир мураббий ишлаётгани сўралди.
— Бизда битта мураббий бор, чунки у жуда яхши. У ўз ишини аъло даражада бажаряпти, бизга совринлар ва ғалабалар олиб келяпти. Энг муҳими эса — биз айнан шундай бўлишини истаймиз, — деди Сересо.
Диего Симеоне "Атлетико"ни 2011 йил декабрь ойида қабул қилиб олган. У мадридликлар билан икки марта Европа лигаси ва Ла Лигада ғалаба қозонган, шунингдек, икки бор Чемпионлар лигаси финалига чиққан.
Симеоне "Атлетико"да ишлаган даврда "Реал"ни қуйидаги мураббийлар бошқарган: Жозе Моуринью, Карло Анчелотти (икки марта), Рафаэль Бенитес, Зинедин Зидан (икки марта), Хулен Лопетеги, Сантьяго Солари ва Хаби Алонсо.
Бугун "Атлетико" ва "Реал" Испания Суперкубогининг ярим финалида тўқнаш келади. Учрашув Тошкент вақти билан соат 00:00'да бошланади. Ғалаба қозонган жамоа финалда "Барселона"га қарши ўйнайди.