Англияда чемпионнинг шарманда бўлиши янгилик эмас

Англия Премьер-лигасининг амалдаги ғолиби “Ливерпуль” янги чемпионатда катта муаммоларга дуч келиб,  қаторасига тўрт маротаба мағлубиятга учради.

Арне Слот шогирдлари “Кристал Пэлас”, “Челси” ва “Манчестер Юнайтед”га бир хил 1:2 ҳисобида ютқазган бўлса, охирги баҳсда “Брентфорд” чемпионни 3:2 ҳисобида таслим қилди.

Opta статистика марказининг маълум қилишича, “Ливерпуль” чемпионлик мавсумидан кейин кетма-кет тўртта учрашувни бой берган ягона жамоа эмас. Бунақаси аввалги чемпионатларда ҳам кузатилган экан.

Манбага кўра, 2016 йили тарихий чемпионликни нишонлаган “Лестер” кейинги мавсумда қаторасига тўрт бор енгилган. 2020 йили “Ливерпуль” худди шу сценарийни бошдан ўтказган ва бу йилги мағлубиятлар серияси “қизиллар” учун янгилик эмас.

Ниҳоят, қаторасига тўрт йил Англия чемпионлигини ушлаб туришни уддалаган ягона жамоа – “Манчестер Сити” ўтган йили кетма-кет тўртта учрашувда рақибларга уч очкодан улашган.

Энди Арне Слот шогирдлари кейинги баҳсларда вазиятни ўнглаб, муваффақиятсиз серияга чек қўйишга ҳаракат қилади.