Англия лигалари Рамазон ойида ўйинлар давомида қисқа танаффусни жорий қилади

Премьер-лига ва Англиянинг бошқа футбол лигалари Рамазон ойи муносабати билан учрашувлар вақтида қисқа танаффусларни қайта жорий этади. Белгиланган тартибга кўра, ўйинлар бир неча дақиқага тўхтатилади, шу орқали мусулмон футболчилар ва ҳакамлар рўзаларини очиш имкониятига эга бўлади. Улар сув ичиш, енгил таом тановул қилиш ёки махсус энергия гелларидан фойдаланишлари мумкин.

Рамазон шу ҳафта бошланиб, бир ой давом этади. Бу даврда мусулмонлар анъанага кўра тонг отишидан қуёш ботгунига қадар ейиш ва ичишдан тийилади.

Аввалги йилларда бўлгани каби, жамоа сардорлари ва ҳакамлар ўйинни тўхтатиш учун қулай паллани белгилаб олади. Танаффус зарурати олдиндан муҳокама қилинади ва тахминий вақт келишиб олинади. Ўйин жараёни қизғин паллада эмас, балки дарвоза зарбаси, жарима тўпи ёки тўпни майдонга ташлаш пайтида тўхтатилади.

Мусулмон футболчиларга Премьер-лига учрашувлари вақтида рўзани очишга рухсат бериш бўйича келишув 2021 йилда қабул қилинган.