Англия клуби ўтган ёз рекорд суммага олинган юлдузни тезроқ йўқотмоқчи

Германиялик ҳужумчи Ник Вольтемаде ёзги трансфер ойнасида “Ньюкасл Юнайтед”ни тарк этиши кутилмоқда. Бу ҳақда Football Insider нашри хабар тарқатди.

Манбага кўра, “қарғалар” асосий эътиборини келаси ёзда янги ҳужумчи харид қилишга қаратади. Шу билан бир қаторда мутасаддилари 23 ёшли Вольтемадени сотиш имкониятини ҳам кўриб чиқмоқда.

Бу футболчи Англия Премьер-лигасига ўтган йилнинг август ойида “Ньюкасл” учун рекорд бўлган сумма – 75 миллион еврога сотиб олинган эди.

Вольтемаде инглиз футболига мослаша олмади. Мухлислар унинг ўйинига кескин эътироз билдира бошлади. Чунки ҳужумчи 13 та ўйиндан бери гол уролмаяпти.

Ник Вольтемаде жорий мавсумда барча турнирларда 37 ўйин ўтказиб, 9 та гол ва 4 та ассист қайд этган. Унинг “Ньюкасл” билан шартномаси 2031 йил ўртасигача амал қилади.