Алонсо “Барса”нинг энг хавфли юлдузини тўхтатиш учун махсус режа ишлаб чиқди. У Ямал эмас!
- 26-октябр 2025, 10:28
- Zohir Toshxo’jayev
- 0
- Футбол
Испания чемпионатининг ўнинчи турида мусобақа жадвалида пешқадамлик қилаётган “Реал” ўз мухлислари кўз ўнгида амалдаги чемпион “Барселона”ни қабул қилади.
Ўтган мавсумда каталонияликлар Карло Анчелотти бошқарувидаги “Реал” билан тўрт маротаба тўқнаш келиб, бу баҳсларнинг барчасида ашаддий рақибни “ер тишлатган” эди.
Бу гал “Реал”ни Ханс-Дитер Флик жамоасига қарши Хаби Алонсо тайёрлади. Испаниялик мутахассис “Барса”нинг энг хавфли ўйинчисини аниқлаб, уни тўхтатадиган махсус режа ишлаб чиқди.
Diario AS нашрининг хабар беришича, Хаби Алонсо рақибнинг муваффақиятларида Педрининг роли катта эканини аниқлаган. Мадридлик чарм тўп усталари бўлажк “эл-класико”да айнан мана шу 22 ёшли футболчини ўйиндан чиқариш топшириғини олди.
Хаби Алонсо агар “Реал” фуболчилари Педрининг ўйинга таъсирини тўсиб қўйса, ўзларида бутун учрашув давомида устунлик қилиш имкони пайдо бўлиши ва бу натижага ижобий таъсир ўтказишига ишонмоқда.
Марказий ярим ҳимоячи позицияда ўйнайдиган Педри жорий мавсумда Ла Лига ва Европа Чемпионлар лигасида 12 та учрашувда қатнашиб, ўз ҳисобига иккитадан гол ва ассист расмийлаштириб қўйди.