Алиқулов бу борада тенгсиз ёхуд 5-бор Суперлигага қайтган "Машъал"ни кимлар олиб чиққанини биласизми?

Муборакнинг фахри бўлган “Машъал” жамоаси ўзининг шарафли тарихи давомида бешинчи марта Про лигада муваффақиятли иштирок этиб, Суперлигага йўлланмани қўлга киритди. Бу натижа жамоанинг юксак мақсад ва интилишларининг ёрқин намунаси бўлиб, ҳар бир мураббийлар, футболчилар ва мухлисларнинг биргаликдаги саъй-ҳаракатлари самараси бўлган.

1994 йил: Борис Серостанов билан илк муваффақият

1994 йилда “Машъал” жамоаси мураббий Борис Серостанов раҳбарлигида биринчи марта олий лигага чиқиш имкониятига эга бўлди. Жамоа 18 клуб орасида ажралиб, 23 ғалаба, 6 дуранг ва 5 мағлубият билан 52 очко тўплади ва биринчи лигада биринчи ўринни эгаллади. Бу натижа жамоа мухлисларининг қалбларида доимий ўрин топган илк ютуқлардан бирига айланди.

2001 йил: Бахтиёр Бобоев бошчилигидаги қайта юксалиш

2001 йилда Бахтиёр Бобоев бошчилигида “Машъал” яна бир бор олий лигага кўтарилиб, юксак натижага эришди. 17 жамоа ичида 24 ғалаба, 4 дуранг ва 4 мағлубият орқали 76 очко жамғариб, биринчи лигада иккинчи ўринни эгаллади ва юқори лигага йўлланмани қўлга киритди. Бу натижа жамоанинг кучлилар қаторида мустаҳкам ўрин топишга бўлган катта қадам бўлди.

2013 йил: Александр Хомяков билан янада муваффақиятли қадам

2013 йилда “Машъал” Александр Хомяков бошчилигида янги ғалабаларга эришди. Жамоа 16 клуб орасида 24 ғалаба, 3 дуранг ва 3 мағлубият натижасида 75 очко тўплаб, биринчи лигада биринчи ўринни эгаллади. Бу сафар ҳам жамоа мухлислари учун ўчмас хотирага айланган ғалаба байрами бўлди.

2019 йил: Асрор Алиқулов бошчилигида яна бир ютуқ

2019 йилда Асрор Алиқулов “Машъал”ни про лигага олиб кирган мураббий сифатида тарихга кирди. 8 жамоа ўртасида 16 ғалаба, 7 дуранг ва 5 мағлубият билан 55 очко тўплаб, про лигада биринчи ўринни эгаллади ва Суперлигага йўлланмани қўлга киритди. Бу натижа Асрор Алиқуловнинг машғулотлар ва тактик маҳоратларини яна бир бор тасдиқлади.

2024 йил: Муддатидан олдин Суперлигага йўлланма

Жорий 2024 йилда ҳам Асрор Алиқулов бошчилигидаги “Машъал” жамоаси муддатидан олдин про лигада 1-ўринни қўлга киритиб, Суперлигага йўлланмани қўлга киритди. 15 ғалаба, 7 дуранг ва 3 мағлубият орқали 52 очко жамғарган жамоа олдиндаги 3 тур қолган бўлишига қарамай, юқори лигага йўлланмага эга чиқди.