Александр Хомяков: "Уй ўйинимиз мухлисларимиз учун байрам"

“Андижон” – “Насаф” (1:1) беллашувидан сўнг уюштирилган матбуот анжуманинг иккинчи қисмида мезбонлар бош мураббийи Александр Хомяков қатнашди.

- Аввало, барча ишқибозларимизни табрикламоқчиман. Чунки ўзимизда мавсумнинг илк ўйинини ўтказдик. Уларни қўшимчасига ғалаба билан хурсанд қилмоқчи эдик. Назаримда, бугун ажойиб футбол муҳити ҳукм сурди. Уй ўйини эса мухлислар учун байрам кунидир. Албатта, ғалаба қозонмоқчи эдик. Афсус, ҳамиша ҳам хоҳлаган нарсангиз бўлавермас экан. Бугун бизда ҳаммаси ҳам ўхшамади. Қолаверса, рақиб кучли бўлиб, ҳужумлари хавфли чиқди. Ўз навбатида биз ҳам олдинга ташландик. Менимча, жанговар дуранг ўйинга ҳар томонлама мос бўлди.

- Ўтган сафар ҳам жамоангиз биринчи бўлимда яхши ўйнаб, иккинчи бўлимда сустлашганди. Бу гал ҳам шундай ҳолат такрорланди.

- Йўқ, бу фикрга қўшилмайман. Гол ўтказиб юборганимиздан кейин режаларимизни ҳам ўзгартиришимизга тўғри келди. Албатта, ташаббусни рақибга бериб қўйдик. Бизга бугун чизиқлар орасидаги узвий уланиш етишмади. Иккинчи бўлимда ҳимояни кўтаришга ва ҳужумда фаолроқ бўлишга интилдик. Боя айтганимдек, икки учрашувдаги ўйинимиз бир хил сценарийда чиққани йўқ. Олдингисига нисбатан биз ўйинимизга ниманидир қўша олдик. Жамоа ўзига ишончни оширмоқда. Қўқондаги учрашувга таққослаганда бугун яхшироқ тўп сурдик. Тўғри, вазиятни ўзгартириш учун шошма-шошарликларга йўл қўйдик. Ҳа, албатта, бизда ҳаммаси ўхшаяпти, дея олмайман. Лекин йигитлар руҳий жиҳатдан ҳам анча жисплашиб бораётганлари мени қувонтирмоқда.

- Янги мавсумда таркибга қўшилган ўйинчилар қанчалик ёқяпти?

- Футболда танлаган ўйинчиларимизни олдин обдон ўрганган, потенциалини чамалаб чиққан бўламиз. Ҳа, янги футболчилар кўпчиликни ташкил этяпти. Аммо уларнинг бирданига зўр ўйнашга киришиб кетишлари учун вақт керак бўлади. Асосийси, клубда олдин бўлганлар ва янги келганларда ўзига яраша потенциал бор.

- Захирадан майдонга тушганлар ўйинни қанчалик кучайтирдилар?

- Олдингисида бундай ўзгаришлар кутилган натижани бермаганди. Лекин бу сафарги учрашувда захирадан тушганларга нисбатан ҳеч қандай эътирозларим йўқ. Ҳаммаси майдондаги шерикларига қўшилиб кета олишди. Масалан, Крезиу яхши киришиб кетди ва бир вазиятда гол уриши ҳам мумкин эди. Машуков ҳам ёмон ўйнагани йўқ. Қисқаси, бу сафар захирадан майдонга тушганлар ўйинга мазмун олиб кира олишди. Азимовда ҳам имконият бўлди. Уларга ҳеч қандай маломат қила олмайман. Тез орада жамоанинг ўйини очилиб кетишидан умидворман. Чунки йигитларнинг бу йўлдаги ҳаракатларини кўряпман ва бу менга ёқмоқда.