Акмал Мозговой: Легионер бўлишимга асосий тўсиқ бу - "Насаф"

"Насаф" жамоаси жорий мавсум Суперлигада чемпион бўлиш учун асосий даъвогарлардан бири саналади. Айни дамда "аждарлар" 38 очко тўплаган ҳолда турнир жадвалида якка пешқадам бўлиб турибди. Клубнинг бундай юқори натижаларни қайд этишида бош мураббий Рўзиқул Бердиев билан бир қаторда тажрибали футболчиларнинг ҳам ҳиссаси катта десак муболаға бўлмайди. 

 

Sports.uz сайти жамоанинг ана шундай катта ҳажмдаги ишини бажарувчи футболчиси ва майдон марказидаги моторига айланиб улгурган Акмал Мозговой билан кичик интервью уюштирди. 

- Аввало таклифимизга йўқ демасдан суҳбатга рози бўлганингиз учун ташаккур. Илк саволни "Париж-2024" Олимпия ўйинлари мавзусида бошласак. Бош мураббий Тимур Кападзе мусобақада 3 нафар ёши катта футболчилар хизматидан фойдаланишни таъкидлаб, кенгайтирилган таркибда сизни ҳам борлингизни айтганди. Аммо якуний таркибда сизга жой топилмади ва бунга муносабатингиз қандай? Умуман олганда, бу мусобақа сизда қандай таассурот қолдирди?

- Авваламбор, ассалому алайкум. Париж Олимпиадаси бутун Ўзбекистон учун тарихий бўлди. Ҳа, тўғри айтяпсиз мусобақага кетиши мумкин бўлган ёши катта футболчилар орасида менинг исмим ҳам бор эди. Ушбу ҳолатда ўзингиз кўрганингиздек ҳимоя чизиғида муаммо бўлиб қолди. Алибек Давронов жароҳат олди. Шу сабаб, Ҳусниддин Алиқулов Парижга олиб кетилди. Агарда Тимур ака чақирганда албатта борардим. Лекин ғалаба учун, натижа қилиш учун ҳамма нарсага тайёр туриш керак ва ҳар бир футболчи буни тўғри тушуниши лозим. Мен ҳам буни одатий қабул қилганман.

- Олимпиадага олиб кетилган 3 нафар футболчи, яъни Шомуродов, Алиқулов ва Ўруновлар танлови қанчалик ўзини оқлади?

- Олимпиадага борган уч нафар футболчи ҳам ўзини оқлади, дея оламан. Ҳар бири нимага қодирлигини ҳаммма яхши билади. Барчаси жуда ҳам тажрибали ва профессионал футболчилар. Ўзларида бор бўлган максимум имкониятларини кўрсатишга ҳаракат қилишди. Нафақат ёши катта футболчилар, балки ҳамма борини берди ҳамда ажойиб ўйин ўтказди. Фақатгина бироз омад етишмади. Бу - футбол ва бунда ғалаба ҳам, мағлубият ҳам сиз билан ёнма-ён бўлади. Улар тарихдаги биринчи Олимпиадада муносиб иштирок этишди, деб бемалол айта оламан.

- Сизга ҳар трансферлар ойнасида бир қанча хориж клубларидан ҳар томонлама яхши таклифлар бўлади. Легионерга айланишингизга ким ёки нима тўсиқ бўляпти?

- Тўғри айтасиз, таклифлар бўлган ва ҳозир ҳам бўляпти. Легионер бўлишимга тўсиқ бўлаётган нарса бу- "Насаф"нинг чемпионлиги. Клубни энг юқори ўринларга кўтариб, кейинчалик бўлгуси режаларни кўриб чиқамиз. Ҳозирги ягона ва олий мақсадим айтиб ўтганимдек, "Насаф" билан Ўзбекистон чемпионига айланиш ва шу йигитлар билан чемпионликни бирга нишонлаш. 

- "Насаф" устози Рўзиқул Бердиевни аксар футболсеварлар клуб миқёсидаги мураббий деб ҳисоблайди. Сиз бу фикрга қанчалик қўшиласиз. Бердиевга Ўзбекистон терма жамоасини ишониб топширилса, уни нимадир қила олишига ишонасизми?

- Рўзиқул Бердиев футболни жуда ҳам севади ва бор вақтини тўлиқ футболга ажратади. Керак бўлса, янги тактика ва усулларни ўрганиш учун бошқа давлатларга бориб ўқиб келади ва бизга ўргатади. Рўзиқул акани фақат клуб миқёсидаги мураббий, деган фикрларга унчалик қўшилмайман. Агарда Рўзиқул Бердиевга терма жамоа мураббийлиги топширилса, натижа ҳам қила олишига аниқ ишонаман. Катта ютуқларга эриша олишига шубҳам йўқ. 

- Мана "Насаф" чемпионлик йўлида дадил одимламоқда ва Суперлигани ютиш учун асосий даъвогар бўлиб турибди. Ва ниҳоят мавсум якунида жамоангизни чемпионлик шоҳсупасида кўряпсизми?

- Таъкидлаганимдек, мақсадимиз - чемпион бўлиш. Бу нарсага эришиш учун эса бор кучимизни ва маҳоратимизни кўрсатамиз. Худо хоҳласа, чемпион бўламиз. Ўтган мавсумда ҳам шоҳсупага кўтарилишимизга оз қолганди. Бу сафар мақсадимизга эришамиз.

- "Насаф" бу мавсум кубок баҳсларида "ўлим гуруҳи"га тушди ва охирги ўринни эгаллаб, мусобақани эрта тарк этди. Суперлигада чемпион бўлиш учун кубок қурбон қилиндими?

- Кубокни қўрбон қилмадик. Ушбу мусобақада ҳам ҳаракат қилдик. Ҳар бир ўйиндан олдин майдонга ютиш учун чиқамиз. Боя ҳам айтганимдек, ютиш ва ютқазиш футболнинг бир қисми. Кубок ўйинларида бизга озгина омад етишмади. 

- Айни дамда ҳеч қандай жароҳатларсиз оптимал спорт формасида бўлиб турибсиз. Бундан ташқари, жамоангизда ҳам кам сонли стабил ўйинчилардан бирисиз. Аммо шундай ҳолатда ҳам терма жамоа эшиклари сиз учун ёпиқлигича қолмоқда. Бу вазият сизни ранжитмайдими? Катанецнинг эътиборига тушиш учун яна нима қилиш керак деб ўйлайсиз?

- Биз профессионал футболчимиз ва ишлашдан тўхтамаслигимиз керак. Катта мақсадни кўзлаган ҳар бир футболчи шундай қилиши керак. Насиб бўлса, терма жамоага ҳам чақирув оламиз ва бор кучимизни кўрсатамиз. Эътиборга тушиш эса, учун энг яхши ўйинларимни кўрсатиб, ҳаракат қилишда давом этамиз

- "ЖЧ-2026 саралаши" ҳал қилувчи босқичига қуръа ташланди. Терма жамоамиз кутилганиданда осонроқ гуруҳдан жой олди. Тарихда илк бор 48 та терма жамоа иштирок этадиган турнирга шу босқичнинг ўзидаёқ йўлланмани қўлга кирита оламизми? Умуман олганда, имкониятларимиз қандай?

- Ўйлашимча, мана шу босқичдаёқ йўлланмани қўлга кирита оламиз. Имкониятимиз жуда ҳам юқори. Таркиб томонлама ҳам анча кучли жамоа йиғилган. 

Суҳбат сўнгида футболчи ўз талқинига кўра, ўзи билан бирга ўйнаган футболчилардан иборат рамзий жамоа тузиб берди.

                                                                                                                                                                                                                         Ойбек Юлдошев суҳбатлашди.