Аҳмедов, Мочинов, Маматказин, Сидоров, Соҳибов ёхуд қўшни чемпионатда яна қайси легионерларимиз бор?
- 23-март 2025, 13:36
- Shuhratbek Jo’rayev
- 0
- Футбол
Бутун дунёда ФИФА кунлари давом этаётгани сабабли миллий чемпионатларда танаффус эълон қилинган. Миллий терма жамоалар жаҳон чемпионати ва яна бошқа мусобақаларнинг саралашлари, шунингдек, ўртоқлик ўйинларида иштирок этишмоқда. Миллий терма жамоамиз “ЖЧ-2026” саралашида 20 март куни Қирғизистон термасини 1:0 ҳисобида мағлуб этди. 25 март санасида эса сафарда Эронга қарши майдонга тушади.
Табиийки, бизнинг Суперлигамизда ҳам танаффус ва ўйинлар 27 мартдан давом эттирилади. Шу фурсатдан фойдаланиб, терма жамоаларнинг фонида Қирғизистон премьер-лигасида тўп сураётган ўзбекистонлик футболчилар ҳақида тўхталмоқчимиз. У ерда 4 март санасидан янги футбол мавсумига старт берилган. Худди биздаги каби Қирғизистон премьер-лигасида иккита тур ўтказилди ва 3-тур 26 мартдан давом эттирилади.
Чемпионатда 14 та клуб қатнашмоқда. Дастлабки иккита турдан кейин “Мурас Юнайтед”, “Алай” ҳамда “Киргизалтин” 6 очко билан пешқадамликни бўлишиб туришибди. Қирғиз клублари янги мавсум учун ҳам ўз таркибларини кучайтириш борасида ўзбекистонлик футболчиларнинг хизматидан фойдаланиш имкониятини ишга солмоқдалар. Нафақат легионерларимиз, балки ўзбек мураббийлари ҳам Қирғизистон премьер-лигасида бош мураббий ва яна бошқа лавозимларда ишлашмоқда. Бир неча йилдан бери мазкур чемпионатда тўп сураётган ва янги мавсум бошида Қирғизистонга кўчиб ўтган легионерларимиз ҳам бор.
Жумладан, ўтган йили Қирғизистонда ва Қирғизистон профессионал футбол лигасида йил мураббийига сазовор бўлган Ислом Аҳмедов “Абдиш Ата”даги муваффақиятли фаолиятидан сўнг бу йил “Азиягол” бош мураббийи сифатида фаолиятини давом эттирмоқда. Бундан ташқари, Александр Мочинов Қўчқор Отанинг “Нефтчи” клуби устозига айланган. Уларнинг ёрдамчилари ҳам ўзбекистонлик. Қолаверса, айрим жамоаларда дарвозабонлар мураббийи ҳам юртимиздан таклиф қилинган.
Энг кўп легионеримизни жамлаган клублар “Алай” билан “ОшМУ” бўлиб, бу икки жамоанинг таркибида олти нафардан ўзбекистонлик футболчилар тўп суришмоқда. Ўтган йили Ўзбекистон Кубогини қўлга киритган, “Андижон” шарафини муносиб ҳимоя қилган Илдар Маматказин ҳам “Алай”да ўйнамоқда. У жамоа сардори сифатида ўзидан илиқ таассурот қолдирмоқда ва шунга яраша жамоаси билан дастлабки иккита турда иккита ғалабани қўлга киритди.
Мухлисларга яхши таниш бўлган ҳимоячи Фарҳод Мираҳматов Мочинов бошқарувидаги “Нефтчи” шарафини ҳимоя қиляпти. Шунингдек, “Навбаҳор”, “Насаф” ва "Локомотив"даги фаолияти орқали танилган россиялик Иван Соловьёв янги ташкил қилинган “Бишкек Сити” клубига ўтиб кетди. Ўз вақтида Ўзбекистон миллий терма жамоасида тўп сурган Жавоҳир Соҳибов бу йил "Озган" жамоасида пайдо бўлди.
Икки йилдан буён мамлакат чемпионлигини қўлга киритиб келаётган “Абдиш Ата” таркибига янги мавсум олдидан ҳамюртимиз Абдуғани Камолов қўшилди. Жорий йилги чемпионат олдидан ўтказилган Суперкубокда “Абдиш Ата” “Мурас Юнайтед”ни пенальтилар сериясида мағлубиятга учратиб совринни қўлга киритди. Камолов беллашувни тўлиқ ўтказди ва янги жамоасидаги илк совринига эга чиқди.
Қирғизистон премьер-лигасида 14 та иштирокчи бўлса, 9 та жамоасида ўзбекистонликлар фаолият олиб бормоқдалар. У ерда энг кўп легионер россияликлар ҳисобланади. Жами 30 нафарни ташкил қилмоқда. Иккинчи ўринда украиналик легионерлар. Уларнинг сони 26 та. Учинчи ўринда ўзбекистонлик футболчилар бўлиб, 25 нафар легионерларимиз рўйхатдан ўтган.
Қирғизистон премьер-лигасидаги ўзбекистонликлар
“Абдиш Ата”
Ҳимоячи: Абдуғани Камолов
-----------------------------------------
“Азиягол”
Бош мураббий: Ислом Аҳмедов
Ёрдамчи мураббий: Аскар Ахметов
Ҳимоячи: Тимур Набиев
Ярим ҳимоячи: Азаматхон Максумов
----------------------------------------------
“Алай”
Дарвозабонлар мураббийи: Азизбек Обубакиров
Ҳимоячилар: Муҳаммадали Турсунов, Жамшид Қобулов, Илдар Маматказин
Ярим ҳимоячилар: Сарвар Аблаев, Исмоил Абдураҳмонов
Ҳужумчи: Нуриддин Нуриддинов
----------------------------------------------
“Илбирс”
Ярим ҳимоячи: Дадахон Юсупов
---------------------------------------------
“Мурас Юнайтед”
Ҳужумчи: Азизбек Кошибханов
-------------------------------------------
“Нефтчи”
Бош мураббий: Александр Мочинов
Ёрдамчи мураббий: Николай Шевченко
Ҳимоячилар: Сирожиддин Башариддинов, Фарҳод Мираҳматов
Ярим ҳимоячи: Шохруҳ Абдуманнопов
---------------------------------------------
“ОшМУ”
Ҳимоячи: Шукуржон Рустамжонов
Ярим ҳимоячилар: Марадона Сафаров, Беҳруз Шодмонов, Хушнуд Бозоров
Ҳужумчилар: Андрей Сидоров, Диёр Жалолдинов
------------------------------------------------
“Озган”
Дарвозабонлар мураббийи: Андрей Бакланов
Дарвозабон: Ислом Абдуллаев
Ярим ҳимоячи: Жавоҳир Соҳибов
Ҳужумчилар: Иззатилла Абдуллаев, Жаҳонгир Кушаков
--------------------------------------------------
“Талант”
Ярим ҳимоячилар: Нурмуҳаммад Тошпўлатов, Улуғбек Шарипов