Абрахам келаси мавсумни қаерда бошлашини айтди

“Рома” тўпурари Тэмми Абрахам якунланаётган мавсумда 51 та учрашувда 26 та тўп киритди. Унинг сермаҳсул ўйини Англия премьер-лигаси грандларининг эътиборини тортмоқда. 24 ёшли форвардга ўз юртининг бир неча клубларидан чорлов бўляпти.

Англиялик ҳужумчи ўзининг премьер-лигага қайтиши ҳақидаги саволларга жавоб қайтарди.

- “Торино”га қарши ўйинда хет-трик қайд этишни истагандим, асосийси, биз ғалаба қозондик. Бу оғир ва узоқ давом этган мавсум бўлди. Жамоадошларимга миннатдорлик билдираман, биз яхши ишладик.  

Олдимизда Конференциялар лигасининг финали турибди. Ҳаммамизда ҳаёжон бор.

Мен аввал айтганимдек, клубимни илк кунданоқ яхши кўриб қолганман ва ҳар доим ўз голларим билан унга ёрдам беришни истайман. Бу мен учун яхши мавсум бўлди ва ютуқларимни давом эттирмоқчиман. Йилни соврин билан якунлай олсак, ҳақиқатан муваффақиятли мавсум бўлади.

Англия премьер-лигасига қайтишим ҳақида кўп сўрашади. Мен “Рома”ни яхши кўраман. Келажакда нима бўлишини билмайман, лекин ҳозир қалбим фақат Римга тегишли, - деди Тэмми Абрахам.