Ўзбекистон олимпия терма жамоасини испаниялик эмас, сербиялик мутахассис бошқариши мумкин

Бугун Ўзбекистон миллий олимпия қўмитасида Ўзбекистон футбол ассоциацияси 1-вице-президенти Умид Аҳмаджонов Ўзбекистон олимпия терма жамоасини бошқаришга асосий номзод бўлган сербиялик мураббий Любинко Друлович билан учрашди. Учрашувда Любинко Друловичнинг ёрдамчилари Завиша Милославлевич ва Небойса Топалов ҳам иштирок этишди. Бу ҳақда ЎФА расмий сайти хабар бермоқда.

Учрашув давомида Умид Аҳмаджонов сербиялик мутахассисни юртимизда кўриб турганидан хурсанд эканини таъкидлар экан, Ўзбекистон истеъдодларга бой ўлка экани, ана шу истеъдодларни жамлаб, 2020 йилда Токиода бўлиб ўтадиган олимпиада мусобақасига йўл олиш асосий мақсад эканини айтиб ўтди.

Бунинг учун Ўзбекистон футбол ассоциацияси томонидан зарур бўлган барча шарт-шароитлар яратилиб, Олимпия терма жамоасининг асосини шакллантириш ишлари аллақачон бошлаб юборилганини қўшимча қилиб ўтди. 

Сербиялик мураббий Любинко Друлович Ўзбекистонга ташриф буюрганидан бениҳоя хурсанд эканини билдирар экан, ўзбек футболи билан яқиндан таниш эканини, хусусан, ўзбекистонлик ёшларнинг шу йил Хитойда бўлиб ўтган Осиё чемпионатида қандай ўйин намойиш этишгани ва чемпионга айланишганидан хабардор эканини айтиб ўтди. Агар мутахассисга Ўзбекистон олимпия терма жамоаси топшириладиган бўлса, жамоа олдига қўйилган асосий мақсад - Токио-2020 йўлланмасини қўлга киритиш учун астойидил меҳнат қилишга тайёр эканини ҳам таъкидлаб ўтди.

 

Айни дамда Любинко Друлович билан музокараларнинг сўнгги босқичи бўлиб ўтмоқда. Агар музокаралар ижобий якунланса, у Ўзбекистон олимпия терма жамоасига бош мураббий этиб тайинланади.

 

Маълумот учун:  

 

Фуқаролиги: Сербия

Туғилган санаси: 11 Сентябрь 1968 (50 ёш)

Мураббийлик даражаси: УЕФА "ПРО" дипломи эгаси (2007 йил)

Энг катта ютуғи: Сербия U-19 терма жамоаси билан Европа чемпионатида ғолибликка эришган

 

 

1. Ангола Суперкубоги Ғолиби – "Агосто" ФК 2010-2011 

2. Европа U-19 Чемпионати ғолиби – Сербия 2013

3. "Партизан" ФК билан Европа лигаси иштирокчиси - 2015-2016

4. БАА U-19 билан жаҳон чемпионати финал қисмига йўл олган - 2017 йил 

 

 

 

Эслатиб ўтамиз, бундан аввалроқ Олимпия терма жамоасини испаниялик мутахассис бошқариши мумкинлиги ҳақида хабар тарқалган эди. Айни дамда эса ушбу терма жамоага Равшан Ҳайдаров бошчилик қилмоқда.