Осиё Кубоги-2019: Гуруҳ босқичининг охирги турида нималар рўй берди?

Хабарингиз бор, айни кунларда Бирлашган Араб Амирликларида Осиё Кубоги-2019 гуруҳ босқич ўйинлари якунланган. Ҳўш, ортда қолган учинчи тур баҳслари бизга нималарни тақдим этди?

Қуйида 3-турнинг қисқача мазмуни борасида сўз юритамиз.

“А” гуруҳи

БАА ва Таиланд терма жамоалари бир тур аввал кейинги босқичга чиқиб бўлишганди. Гуруҳдаги охирги ўйинда эса ўзаро рўбарў келган ушбу рақиблар 1-ўрин масаласига ойдинлик киритишди. Ўзларини ортиқча қийнамаган баҳсда дуранг қайд этилди.

Баҳрайн эса турнирда кўпчиликни ҳайрон қолдираётган Ҳиндистонни кичик ҳисобда таслим этди. 90-дақиқада пенальтидан киритилган гол баҳрайнликларни 3-ўрин билан плей-оффга олиб чиқди. Ҳиндлар эса уйга қайтишди.

БАА - ТАИЛАНД 1:1

Голлар: Мабхут 7 – Пуангчан 14

ҲИНДИСТОН - БАҲРАЙН 0:1

Гол: Рашед пенальти 90

 

“В” гуруҳи

Биринчи турдаги мағлубиятдан тўғри хулоса чиқарган Австарилия кейинги ўйинларда муҳим очколарни жамғарди. Охирги турда Сурияни қўшимча дақиқада киритилган гол эвазига зафар қучди. Сурияликларга эса мураббий ўзгариши ҳам ёрдам бермади. Шу ўринда яна ўша гап: Отлар кечувда алмаштирилмайди.

Иордания учта баҳсда 3 бор тўпни тўрга йўллаб, ўз дарвозаси бирор марта ҳам ишғол қилинишига йўл қўймади. Бу гуруҳдаги учинчи ўринни эгаллаган жамоага кейинги босқичга чиқиш насиб этмади.  

АВСТРАЛИЯ - СУРИЯ 3:2

Голлар: Мабил 41, Оикономидис 54, Бехич 90+3 – Харбин 43, Ас Сума пенальти 80

ФАЛАСТИН - ИОРДАНИЯ 0:0

 

“С” гуруҳи

Турнир фаворитларидан бири ҳисобланган Жанубий Корея сўнгги турда енгил ғалаба қозонди. Гарчи рақиб Хитой бўлса ҳам.

Қирғизистон тарих яратмоқда. Осиё Кубоги-2019 улар учун дастлабки қитъа чемпионлиги эди. БААда илк голларини уришди. Мана энди улар энг яхши натижа кўрсатган 3-ўрин соҳибларидан бири сифатида нимчорак финал чиптасини қўлга киритишди. Қўшниларимизнинг “ширин эртаги” ҳозирча давом этмоқда.

ЖАНУБИЙ КОРЕЯ - ХИТОЙ 2:0

Голлар: Хван пенальти 14, Ким 51

ҚИРҒИЗИСТОН - ФИЛИППИН 3:1

Голлар: Люкс 24, 51, 77 – Шрок 80

 

“D” гуруҳи

Бу гуруҳда 3 та жамоа плей-оффда. Ироқ ва Эрон иккита ўйинда масалани ҳал қилганди. Учинчи турда Вьетнам ғалаба қозонди ва омадли 3-ўринликлар қаторига қўшилди.

Маълумот ўрнида, гуруҳ ғолибини аниқлаб берадиган Ироқ – Эрон учрашувини ҳамюртимиз ФИФА рефериси Равшан Эрматовга ишониб топширилди. Масъулиятли беллашувни вакилимиз аъло даражада бошқарди. Буни мураббийлар ва эронлик журналистлар ҳам эътироф этишди.

Энди Эрматов нимчорак финалидан ўрин олган Япония – Саудия Арабистони баҳсида ҳам ҳакамлик қилади.

ВЬЕТНАМ - ЯМАН 2:0

Голлар: Нгуен Куанг Хай 38, Куэ Нгок Хай пенальти 64

ИРОҚ - ЭРОН 0:0

 

“E” гуруҳи

Гуруҳда Саудия Арабистони етакчиликни қўлга олса керак деган тахминлар билдирилганди. Аммо Қатар бу қарашлар акси эканлигини кўрсатди. ЖЧ-2022 мезбони учта турда ҳам ўз дарвозаси дахлсизлигини сақлаб қолди. Қизиқ жиҳати шундаки, турнирнинг айни пайтдаги тўпурари ҳам қатарлик Ал Моез Али (7 та гол) ҳисобланади.

Ливан 3-турда КХДР  устидан 4:1 ҳисобида устун келиб, очколари сонини 3 тага етказиб олди. Тўплар фарқи – 4-5.

Ливанда ҳам тўртта жамоа қаторига кириш имконияти мавжуд эди. Улар Вьетнам билан бир хил очко ва тўплар фарқига эга эдилар. Бироқ Миодраг Радулович шогирдлари турнир давомида 6 бор ҳакамлар томонидан огоҳлантирилди. Вьетнамда эса бу кўрсаткич 5га тенглиги боис, ливанликлар мусобақа билан ҳайрлашишларига тўғри келди. Вьетнам эса курашни давом эттиради.

САУДИЯ АРАБИСТОНИ - ҚАТАР 0:2

Голлар: Али 45, 80

ЛИВАН - КХДР 4:1

Голлар: Пак Кван Рен 9, Эл Хельве 65, 90+8, Маатук пенальти 80 – Мелки 27

 

“F” гуруҳи

Ўзбекистон миллий терма жамоаси 3-тургача етакчилик қилаётганди. Гуруҳнинг охирги ўйинида 1-ўрин кимга насиб этишига ойдинлик киритилди. Ҳамюртларимиз Японияга қарши саф тортишди. Рақибимиз устози Хажиме Мориясу деярли асосий таркибсиз ўйин ўтказса-да, ғалабага эришди ва улар Австралияга дуч келмайдиган бўлишди. Эртор Купер эса жароҳатлар, карточкалар ва футболчиларнинг толиқмаслиги учун учинчи турни қурбон қилди. Аргентиналик мураббий кейинги босқичдаги рақибдан чўчимай шундай йўл тутдими ёки бошқа, буниси бизга қоронғу. Аммо энди биз “яшил қитъа” вакилларини ютишимиз шарт. Акс ҳолда Япониядан учралган мағлубият ҳамда бу ўйинга эътиборсизлик қимматга тушиши мумкин.

Уммон эса Туркманистонни таслим этди ва учинчи ўринни эгаллаганлар қаторидан ўрин эгаллади.

ЯПОНИЯ - ЎЗБЕКИСТОН 2:1

Голлар: Шомуродов 40 – Муто 43, Сиотани 58

УММОН - ТУРКМАНИСТОН 3:1

Голлар: Кано 20, Ал Гассани 84, Ал Мусалами 90+3 – Аннардурдиев 41

Гуруҳ босқичидан сўнг 16 жамоа нимчорак финалга йўл олди.

Жамоалар қуйидаги схема орқали баҳсларга киришишади.