Yana bir katta turnir Xolandsiz o‘tadi!

2022 yilning yozida "Manchester Siti" "Borussiya"dan 60 million evro evaziga Erling Xolandni sotib oldi. Jamoa u kelishi bilanoq Chempionlar ligasi, APL va Angliya kubogini qo‘lga kiritib, trebl qayd etdi. Hujumchi esa 53 ta o‘yinda maydonga tushib, 61 ta golda ishtirok etdi. Shu bilan birga, Gvardiola futboliga mos tushmaydi, degan tushunchani yo‘q qilib, asosiy g‘alabalar kaliti sifatida ko‘rildi. Ayniqsa, "shaharliklar"ning eng katta orzularidan biri bo‘lgan EChLni yutishda uning hissasi katta bo‘ldi. Xoland ajoyib mavsum o‘tkazganidan keyin "Oltin to‘p" uchun kurashga qo‘shildi. Ayni paytda dunyo ikkiga bo‘lingan: Ba’zilar bu sovringa 23 yoshli hujumchini loyiq ko‘rsa, ba’zilar jahon chempionligini toshi og‘irroq ekanligini aytishmoqda. Ammo bu boshqa mavzu, shunisi aniqki, Erlingni "Oltin to‘p"dan mosuvo qilgan yana bir omil bu - terma jamoa!

Xoland 2000 yil Angliyaning Lids shahrida tug‘ilgan. O‘sha paytda uning otasi Alf-Inge Xoland "Lids" sharafini himoya qilardi. Oradan 3 yil o‘tib, himoyachi jiddiy jarohat oladi va futbolchilik faoliyatini yakunlaydi. Shundan so‘ng ular Norvegiyaga ko‘chib ketadi, ya’ni kichik Xoland ingliz emas, balki skandinaviyalik bo‘lib tarbiya topadi. Shu sababli ham unda "uch sherlar" safida to‘p tepish imkoni bo‘lganda, rad javobini berib, Norvegiyani tanlaydi. Buni futbolchining o‘zi ham tasdiqlagan: "Men Angliyada 3, 4 yil va umrimning qolgan qismida Norvegiyada yashadim. Bu terma jamoani tanlashimning asosiy sababi ham shunda. Agar otam Manchesterda qolganida, balki ingliz bo‘lardim", - degan Xoland "Goal" nashriga. 

2021 yilda Norvegiya Qatardagi mundial saralashi uchun kurashda "G" guruhdan joy olib, Turkiya va Niderlandiyadan keyin 3-o‘rinni egallab, JCh yo‘llanmasini qo‘ldan chiqardi. Biz o‘tgan yili bo‘lib o‘tgan Jahon chempionatini Xolandning gollarisiz tomosha qildik. Undan oldingi "Evro-2020" turnirida ham "vikinglar" ishtirok etmagan. Erlingning terma jamoadagi faoliyatini tanqid qilib bo‘lmaydi. Sababi, u 27 ta o‘yinda maydonga tushib, 27 marta raqiblar darvozasini ishg‘ol qilishga muvaffaq bo‘lgan. Ammo yana bir katta turnir Xolandsiz o‘tadigan bo‘ldi.

"Evro-2024" saralashidan o‘rin olgan uchrashuvlar o‘z nihoyasiga etib, turnirga yo‘l olayotgan jamoalar nomi ma’lum bo‘lyapti. Shu bilan birga, Germaniyaga bormaydiganlar nomi ham aniqlashib bormoqda. 10-turga kelib, bo‘sh o‘rinlar 7 ta qoldi. Norvegiya "B" guruhidan joy olgan bo‘lib, Ispaniya va Shotlandiyadan keyin 3-o‘rinda turibdi. "Vikinglar" 10 ochko jamg‘arishga muvaffaq bo‘ldi. Ular bu terma jamoalarga qarshi hech qanday qarshilik ko‘rsata olmadi. Faqatgina so‘nggi o‘yinda Shotlandiya bilan 3:3 hisobida durang o‘ynadi. Qahramonimiz Xoland esa 6 ta gol urishga ulgurdi. Norvegiya allaqachon turnirga saralash orqali chiqa olmasligi ma’lum bo‘lgandi. Solbakken shogirdlari Millatlar ligasi orqali "Evro-2024" o‘ynashi mumkin edi, lekin Isroil bu o‘rinni ilib ketdi. Xullas, matematik jihatdan norvegiyaliklarda imkon qolmadi.

Agarda o‘shanda futbolchining otasi jiddiy jarohat olib, faoliyatini yakunlamaganida, balki Erling Angliya terma jamoasi libosida maydonga tushayotgan bo‘lardi. Ammo "uch sherlar" tarkibida Xarri Keyndek straykerning bo‘lishi, muammoga aylanishi mumkin bo‘lar, yoki buning aksi inglizlar Xoland va Keyn tandemini yaratib, allaqachon sovrin yutgan bo‘lardi. 

Hozir Xolandning "Evro-2024"da maydonga tusha olmasligi unchalik fojia bo‘lib ko‘rinmas. Ammo tasavvur qilaylik, keyingi "Oltin to‘p"ni Mbappe yutsa va bunga uning "Evro-2024"dagi o‘yinlari sabab bo‘lsa, dunyo yana ikkiga bo‘linadi. So‘nggi paytlarda "Oltin to‘p"ni qo‘lga kiritgan futbolchilarga e’tibor beraylik: Messi, Modrich kabi futbolchilar aynan terma jamoadagi o‘yinlari evaziga g‘olib chiqmadimi? Benzema bundan mustasno, lekin 2022 yilda na Evro, na Kopa Amerika va na Jahon chempionati o‘tkazildi.