Timur Kapadze: "Andijon" borini tashlashini bilardik"

“Андижон” – “Навбаҳор” (0:1) ўртасидаги учрашувдан сўнг ташкиллаштирилган матбуот анжуманида меҳмонлар бош мураббийи Тимур Кападзе қатнашди.

- Биринчи навбатда бутун жамоа ва мухлисларини ғалаба билан табриклайман. Дерби барибир дерби. Ўйин даражаси ҳам кўрсатди. Худога шукр, ғалаба қозондик. Иккала жамоа мухлисларига қўллаб-қувватлаганликлари учун раҳмат айтаман. Яхши ўйин бўлди, уларни хурсанд қилдик. Футболчиларимни табриклайман, яхши ҳаракат қилишди. Учрашув давомида хатолар ҳам, яхши вазиятлар ҳам бўлди. Иккала жамоа ғалаба учун борини берди, бизга насиб қилди. Кейинги ўйинга тайёргарлик кўрамиз. Кейинги учрашувларда “Андижон” жамоасига ҳам омад тилайман.

- Забиҳилло Ўринбоевни ҳолати қанақа?

- Иккита қовурғаси синган дейишди, бироз вақтни олади. Футболда жароҳат бўлиб турадиган нарса, ваҳимали жойи йўқ. Ўйлайманки, у ҳам, қолган футболчилар ҳам сафга қайтишади. Ҳар бир футболчини ўрни бор. Яна бир бор ҳаммани ғалаба билан табриклайман. Ҳар тарафлама жуда ҳиссиётларга бой, қийин ўйин бўлди. Барибир Андижонда ўйнаш осон эмас. Ҳозирги вазиятдан келиб чиқиб, “Андижон” борини ташлашини билардик. Биз ҳам яхши ҳаракат қилдик, имкониятимизни кутдик. Худога шукр, охирида нуқтани қўйдик.

- Эрондаги легионерларимизни “Нефтчи”, “Пахтакор”, “Андижон” каби клублар ўз сафига қўшиб олишга ҳаракат қилишяпти. “Навбаҳор”да ҳимоя чизиғида муаммолар бор. Рустам Ашурматовни қўшиб олиш варианти кўриб чиқилмаяптими?

- Учта жамоани айтдингиз, бизни ҳам қўшиш керак-да, биз ҳам ҳаракатдамиз. Биз ҳам ҳар бир футболчи билан гаплашяпмиз. Ҳар бир клубни кучайтирадиган футболчилар. Бу нарса устида ишлаяпмиз. Қолгани ўйинчиларни танловига қолади.

- Бу ғалабани 6 очколик деб ҳисоблайсизми?

- Унчалик 6 очколик демаган бўлардим. 3 очкони олдик, ўйинлар ҳали кўп. Кейинги ўйинга тайёргарлик кўришимиз керак. Ҳар бир беллашув муҳим, бизга. Янги жамоа, янги ўйинчилар. Ўйиндан-ўйинга ишонч яхши бўляпти. Буни охирида кўрамиз. Агар “Андижон” тепада бўлса, демак 6 очколик бўлган бўлади. Ҳозир бир нарса дейиш қийин. Аммо бу принципиал дерби. Бир пайтлари “Нефтчи”да ўйнаганимда “Навбаҳор” ва “Андижон” билан дербиларни сезардим. Кейин узоқлашган эканман. Қўқон билан ўйнадик, аммо барибир бу “Нефтчи” ва “Андижон” билан ўйин даражасида эмас. Бугун иккала мухислар ажойиб мухлислик қилишди ва даража ҳам сезилди.

- Одатда, дербиларда гол кам бўлади, бу сафар ҳам биргина гол ўйин тақдирини ҳал қилди...

- Гол кам бўладими, кўп бўладими, энг асосийси, дербида ғалаба қозониш. Ҳеч кимни ютқазгиси келмайди. Иккала жамоа курашди. Минимум имкониятдан фойдаланишга ҳаракат қилишди. Биз улар учун кутилмаганда стандартдан охирида гол уриб кетдик. Албатта, биз кутгандик. Тўғри ёндашдик.