Shomurodovdan hammaga xushxabar!

“Roma” va O‘zbekiston milliy terma jamoasi hujumchisi Eldor Shomurodovdan yaxshi xabar keldi. 29 yoshli hujumchi jarohatidan to‘liq qutilib, “bo‘rilar”ning umumiy guruh mashg‘ulotlariga qo‘shildi.

Ma’lumki, Eldor Shomurodov noyabrdagi FIFA kunlari doirasida 2026 yilgi jahon chempionati mintaqaviy saralash turnirining Qatarga qarshi o‘tkazilgan uchrashuvda shikastlangan edi. Bellashuvning dastlabki daqiqalarida chap soni mushaklarida kuchli og‘riq his qilgan futbolchimiz shifokorlar bir necha marotaba tibbiy yordam ko‘rsatganiga qaramay, bo‘lim o‘rtalarida o‘yinni tark etishga majbur bo‘lgandi.

Jarohatdan keyin terma jamoa rahbariyati Shomurodovni Rimga qaytarib yubordi. Poytaxt klubi vakillari legionerimizni chuqurlashtirilgan tekshiruvdan o‘tkazib, mushaklarida jarohat borligini tasdiqladi va davo choralarini ko‘rdi.

Shomurodov O‘zbekiston milliy terma jamoasiga kelib qo‘shilgan pallada “Roma” xo‘jayinlari bosh murabbiyni almashtirib ulgurgan edi. Ikki oy ishlagan xorvatiyalik mutaxassis o‘rniga “Kalyari”ni yuqori divizionda olib qolganidan keyin o‘tgan mavsum yakunlanmay turib, faoliyatini tugatganini e’lon qilgan Klaudio Raneri olib kelindi.

Raneri o‘shanda faqatgina “Roma”ning taklifiga yo‘q deya olmasligini aytgan. Oxiri shunday bo‘lib chiqdi. Rimlik mutaxassis sevimli jamoasini mavsum oxirigacha boshqaradi.

Eldor Shomurodov o‘tgan mavsumni aynan Raneri qo‘l ostida o‘tkazdi va eng muhim uchrashuvlardagi gollari, assistlari bilan “Kalyari”ning A Seriyada qolishiga muhim hissa qo‘shdi.

- “Roma” dushanba kuni “Atalanta” bilan bo‘ladigan uchrashuvga puxta tayyorgarlik ko‘rish uchun mashg‘ulotlarga zo‘r bermoqda. Bosh murabbiy Klaudio Raneri uchun yaxshi xabar. Tajribali murabbiy umumiy guruh mashg‘ulotlarida jarohatidan qutilgan Eldor Shomurodovni kutib oldi. O‘zbek hujumchisi jamoadosh do‘stlari bilan birga shug‘ullandi, - deb yozmoqda   vocegiallorossa.it sayti.

- Ranerida shogirdlarining tayyorgarlik darajasini baholash va ulardan eng yaxshilarini tarkibga jalb qilish uchun hali yana vaqt bor.

Trigoriyadagi mashg‘ulotlarga hujumchi Eldor Shomurodovning qo‘shilgani Klaudio Ranerini xursand qildi. O‘zbekistonlik legioner milliy terma jamoadagi uchrashuv chog‘ida jarohat olgandi. Uning chap oyoq son mushaklari shikastlangani aniqlangandi.

Shomurodov salomatligini to‘liq tiklab oldi, umumiy guruh mashg‘ulotlariga qaytib, poytaxt jamoasining hujumkorlik salohiyatini oshirdi, - deb yozmoqda siamolaroma.it sayti eksperti Lorentso Luchani.

- Keyingi paytda “Roma” o‘yinlarida gollarni markaziy himoyachilar – Bryusseldagi bahsda Janluka Manchini, Londondagi uchrashuvda Evan Ndika va Mats Xummels kiritdi.

Umuman olganda, rimliklar A Seriya va Evropa ligasida jami 18 ta bellashuvda raqiblar darvozasini 19 marotaba ishg‘ol qildi. Har bir uchrashuvga bittadan gol to‘g‘ri keladi. Shulardan oltitasi Artyom Dovbika, ikkitadani Paulo Dibala va Stefan El-Shaaravi, bittadani Eldor Shomurodov, Tommazo Baldantsi, Brayan Kristante, Nikolo Pizilli, Manu Kone, Matias Sule, Janluka Manchini, Evan Ndika va Mats Xummels hisobga yozilgan.

Endi “Atalanta” bilan bo‘ladigan o‘yin yaqinlashayotgan pallada hujumchilardan Eldor Shomurodov safga qaytdi. O‘zbek hujumchisini unga “Kalyari”da ustozlik qilgan “Roma”ning yangi bosh murabbiyi Klaudio Raneri xursandchilik bilan kutib oldi, - deb yozmoqda laroma24.it sayti.

“Roma” va “Atalanta” o‘rtasidagi uchrashuv 2 dekabr kuni Toshkent vaqti bilan tungi soat 00:45 da Rimdagi “Olimpiko” stadionida boshlanadi.

Rossiya terma jamoasi O‘zbekiston bilan o‘ynashi kutilmoqda!

“Lans” muxlislari Husanovning superklubga transferiga qanday munosabat bildiryapti?

Fayzullaev transferida “to‘ydan oldin nog‘ora qoqmaylik”!

Ikki superklub Husanov uchun duelga kirishdi