“Roma”ning yangi raqibi aniq!

“Roma” 6 avgust kuni Gamper kubogi doirasida “Barselona” bilan uchrashuv o‘tkazishdan bosh tortgandi. Shunga qaramay, Joze Mourino shogirdlar aynan mana shu sanada boshqa o‘rtoqlik o‘yinida qatnashishga majbur.

Ma’lumotlarga ko‘ra, rimliklar Ukrainaning “Shaxtyor” jamoasi bilan o‘rtoqlik o‘yinida maydonga tushishi talab qilinmoqda.

“Roma” o‘z vaqtida “Shaxtyor”ni boshqarayotgan Paulu Fonsekani bosh murabbiy qilib olib kelganida donetskliklarga 1,5 million evro kompensatsiya to‘lashdan tashqari, bu klub bilan o‘rtoqlik o‘yini o‘tkazishni ham va’da qilgan.

“Shaxtyor” shu kunga qadar bir necha marotaba bu uchrashuvni o‘tkazishga urindi. Biroq, “Roma” bunga shoshilmayotgan edi. Endi ukrainaliklar masalaga jiddiy yondashmoqda.

Agar Rim klubi bu gal ham o‘yindan bosh tortsa, shartnomada belgilangan 300 ming evroni jarima sifatida to‘laydi.