“Real”ga supergol urgan Yaxshiboev o‘ziga yangi jamoa topdi
- 21-январ 2024, 08:30
- Zohir Toshxo’jayev
- 3
- Futbol
O‘zbek futbolining keyingi yillardagi eng iqtidorli futbolchilaridan hisoblangan Jasur Yaxshiboev yana jamoasini o‘zgartiradigan bo‘lyapti.
26 yoshli hujumkor futbolchimiz faoliyatini legioner sifatida davom ettirishni ma’qul ko‘rdi. Manbalardan biri – meta-ratings.kz saytining ma’lum qilishicha, o‘zbekistonlik o‘yinchi Qozog‘istonning amaldagi chempioni – “Ordabasi”ning xorijiy yig‘iniga qo‘shilish uchun Turkiyaga etib borgan.
O‘tgan mavsumda chimkentliklar safida ikki nafar o‘zbek futbolchisi – Shahboz Umarov va Bobur Abduxoliqov o‘ynagan va ular jamoaning chempion bo‘lishiga katta hissa qo‘shgan edi.
Mavsumlar oralig‘ida chempion jamoa safida katta o‘zgarishlar bo‘lyapti. Xususan, klub rahbariyati yangilandi. O‘yinchilar orasida ham yangiliklar bor. Xususan, o‘tgan yili jamoaning barcha uchrashuvlarida qatnashib, 26 ta o‘yinda ettita gol urgan Bobur Abduxoliqov “Nasaf”ga qaytishga qaror qildi.
Shahboz Umarov faoliyatini qaerda davom ettirishi yoki Chimkent jamoasida qolishi haqida hozircha aniq ma’lumotlar yo‘q.
Ta’kidlash joizki, Jasur Yaxshiboev bir necha yil muqaddam Belarus chempionatiga yo‘l olganida “Energetik-BGU” safida yarim mavsum Shahboz Umarov bilan birga o‘ynagan. Bobur Abduxoliqov esa, bu ikki legionerimizdan keyin “Energetik-BGU” safida porlagan va bir necha individual sovrinlarni qo‘lga kiritgandi.
Jasurbek Yaxshboevning faoliyati ancha qiziqarli voqealarga boy tarzda kechayotganini ham ta’kidlash lozim.
Yaxshiboev aslida “Paxtakor” tarbiyalanuvchisi hisoblanadi. “Sherlar” boshlang‘ich tarkibidan muqim joy berilmaganidan keyin u dastlab, Olmaliq jamoasida ijarada o‘ynadi. 2020 yilning martida kutilmaganda Belarusga yo‘l oldi. Avvaliga “Energetik –BGU”da to‘purarlik qobiliyatini namoyish qilgan Jasur ikkinchi davrani “Shaxtyor-Soligorsk” jamoasi boshladi va yakunda mamlakat chempionligini qo‘lga kiritdi.
Yaxshiboev Evropaning kuchliroq ligalarida o‘ynash maqsadida Polshaning eng mashhur jamoasi “Legiya”ga ko‘chib o‘tdi. Biroq bu jamoada unga imkon berishmadi. Varshavaliklar bir necha oydan keyin legionerni Moldovaning “Sherif” jamoasiga ijaraga berib yubordi.
“Sherif”da Jasurning natijalari yaxshilandi. Ayniqsa, Moldova klubi o‘z tarixida ilk bor Evropa Chempionlar ligasining guruh bosqichida qatnashdi. 2021 yilning 28 sentyabr sanasi Yaxshiboevning xotirasida bir umrga qoladigan bo‘ldi.
Jasur “Santyago Bernabeu” arenasida o‘tkazilgan uchrashuvda “Real” darvozasini ishg‘ol qilib, jamoasining tarixiy g‘alabasiga hissa qo‘shdi. Shu tariqa, Yaxshiboev Madridda “Real” darvozasiga gol urgan birinchi o‘zbek futbolchisi bo‘ldi.
Ikki yil davomida uchta mamlakatda to‘p tepgan Yaxshiboev Belarus, Polsha, Moldova chempioni bo‘ldi.
2022 yilning yozida Yaxshiboev O‘zbekistonga qaytdi va “Navbahor”dan qo‘nim topdi.
Endi hamyurtimizning faoliyatida yangi sahifa ochilmoqda. Yaxshiboev kelasi mavsum “Ordabasi”ning chempionlik unvonini himoya qilishiga va Evropa Chempionlar ligasi saralash bosqichlaridan muvaffaqiyatli o‘tishiga ko‘maklashishiga umid qilamiz.