Mundialga ilk qadamlar: Ravshan Ermatov O‘zbekiston terma jamoasining rejasi haqida gapirdi

O‘zbekiston futbol assotsiatsiyasining birinchi vitse-prezidenti Ravshan Ermatov UzAga intervyu berib, Jahon chempionati oldidan jamoamizning taqvimi hamda bo‘lajak turnirdan kutilayotgan natijalar haqida o‘z fikrlari bilan o‘rtoqlashdi. 
 
"O‘zbekiston terma jamoasi 5 may kuni "Milliy futbol markazi"da Jahon chempionatiga tayyorgarlik ko‘rishni boshlashadi. Umid qilamiz, barcha o‘yinchilarimiz sog‘lom hamda yuqori formada kelib, mundianga yaxshi tayyorgarlik ko‘rishadi. 5 maydan 26 mayga qadar "Milliy futbol markazi"da yig‘inlar o‘tkaziladi. 
 
Shuningdek, 3 ta nazorat uchrashuvlari bo‘lib o‘tadi. 26 may kuni esa Nyu-Yorkka uchib ketib, u yerda mashg‘ulotlar boshlanadi. 30 mayda Kanadaga borib, 1 iyun kuni bo‘lib o‘tadigan Kanadaga qarshi birinchi o‘rtoqlik uchrashuviga tayyorgarlik ko‘riladi va o‘yin o‘tkazilib, yana Nyu-Yorkka qaytilinadi. 2 iyundan boshlab, Nyu-Yorkda bir haftalik o‘quv-yig‘in mashg‘ulotlari bo‘lib o‘tadi. Ushbu vaqt davomida futbolchilarimiz vaqtga va iqlimga ancha moslashgan bo‘ladi. 
 
Bundan tashqari, 8 — 9 - iyun kunlari yana bir o‘rtoqlik bellashuvida ishtirok etamiz. Bu borada so‘nggi muzokaralar o‘tkazilayapti. Keyin esa 10 iyun kuni terma jamoamiz FIFA tomonidan ajratilgan Atlantadagi bazaga uchib borib, Kolumbiyaga qarshi ilk o‘yin uchun oxirgi tayyorgarlikni amalga oshirishadi. 
 
O‘zbekiston terma jamoasi Jahon chempionatiga ilk bor chiqayotgani bois, ularga yuklamalar kamroq bo‘ladi. Aynan bu mundialdan kutilmalar qanday? 
 
"Albatta, biz Jahon chempionatini uzoq kutdik. Xalqimizning duo­lari orqali shu yerga­cha yetib keldik. Shuningdek, prezidentimiz ishonchlari va qo‘llab-quvvatlovlari bilan Jahon chempionatiga chiqadigan kun ham keldi. Bo‘lajak turnirda muvaffaqiyatli ishtirok etib, xalqimizni xursand qilish - asosiy vazifamizdan biri. Shuningdek, guruhdagi raqiblarimiz jiddiy. Portugaliya terma jamoasi 9 marta, Kolumbiya 7 marta ishtirok etishga muvaffaq bo‘lgan. Biroq, bizda ham juda yaxshi jamoa shakllanganligini so‘nggi o‘yinlar ko‘rsatmoqda. Nasib qilsa, jamoamiz bilan yaxshi ishtirok etgan holda, xalqimizni xursand qilamiz degan umiddamiz", - deya o‘z fikrlari bilan o‘rtoqlashdi Ravshan Ermatov.