O‘zbekiston terma jamoasini boshqargan murabbiy Maradonani maqtab, Messining asosiy kamchiligini aytdi

2006 yilda “Paxtakor” va O‘zbekiston milliy terma jamoalarini boshqargan rossiyalik mutaxassis Valeriy Nepomnyashchiy Maradona haqida gapirar ekan uning Messidan ustun jihatini ham aytib o‘tdi.

- Hech qachon Maradona bilan uchrashishni o‘ylamaganman. Lekin 1990 yilgi jahon chempionatidagi ilk uchrashuvimizdan oldin u jamoamiz oldiga keldi. U bizga ta’sir o‘tkazmoqchi edi. Avvaliga Maradona birinchi o‘yinda o‘ynamasligi haqida xabar tarqaldi. Shogirdlarim bo‘shashib qoldi. Keyin bu xabar inkor etildi. Biz keskin va qo‘pol o‘ynadik. Ikki o‘yinchim haydaldi. Lekin Maradonaga qarshi hech kim qo‘pollik ishlata olmadi.

U o‘ziga xos edi. Yorqin o‘ynardi, yorqin yashadi. Haligacha milliardlab odamlar uning raqami tushirilgan libosini xarid qilyapti.

Ko‘pchilik Messi haqida uning o‘rinbosari sifatida gapiryapti. Lekin bunday emas. Messi terma jamoani o‘z ortidan ergashtira olmaydi. Maradona buni ko‘p uddalagan, - dedi  Valeriy Nepomnyashchiy.