Oʻzbekiston Superkubogi oʻyini ilk bor "Bobur arena"da oʻtkaziladi

Uzoq tanaffusdan keyin Superliga chempionligini qo‘lga kiritgan Neftchi hamda mamlakat kubogining amaldagi g‘olibi Paxtakor o‘rtasidagi Superkubok o‘yini Andijonda o‘tkaziladi. 

Ta’qvim rejaga ko‘ra, Superkubok bellashuvi 15 mart kuni bo‘lib o‘tadi. So‘nggi yillarda Liga Superkubok uchrashuvini may oyida o‘tkazib kelaotgandi. Biroq mamlakat bosh jamoasi Jahon kubogida ishtirok etadigan mavsumda muxlislar uchun ahamiyatli bo‘lgan super uchrashuv mart oyiga rejalashtirildi. 

Superkubok o‘yiniga Olmaliq yoki Namangan shahridagi stadionlar ham mezbonlik qilishi mumkin edi. Biroq OKMK va Markaziy stadionlarida ta’mirlash ishlari davom etayotgan bo‘lib, ularning qayta ish boshlash sanalari aniq emas. Shundan kelib chiqqan holda, Andijondagi "Bobur arena" varianti eng maqbul variant deb topildi. 

"Bobur arena" ketma-ket ikkinchi mavsum katta futbol uchrashuviga mezbonlik qiladi. Bir yil muqaddam O‘zbekiston kubogining final uchrashuvi tarixda ilk bor Andijonda o‘tkazilgandi. Qayd etish kerakki, viloyat hozirga qadar Superkubok o‘yiniga mezbonlik qilmagan va mazkur voqelik ham "Bobur arena" uchun birinchisi hisoblanadi.