"Olimpik" ustozi yirik hisobdagi mag‘lubiyatdan so‘ng: "Futbol o‘ynashga maksimal xohish bo‘lmayapti"

O‘zbekiston Kubogi guruh bosqichida Toshkentning “Olimpik” klubi ikkinchi tur o‘yinida G‘uzorda “Sho‘rtan”ga qarshi maydonga tushib, 0:3 hisobida imkoniyatni boy berdi.

Qolaversa, “Olimpik” futbolchisi 2-daqiqadayoq maydondan chetlatildi. Shuning uchun ular o‘yinni deyarli 10 futbolchi bilan o‘tkazishga majbur bo‘ldilar.

Uchrashuvdan so‘ng “Olimpik” bosh murabbiyi Mirko Elichich bir qator savollarga javob qaytardi.

- O‘yinning dastlabki daqiqasidanoq futbolchimiz maydondan chetlatildi. Hakamlar va nazoratchilar bor, to‘g‘ri yoki noto‘g‘riligini ular bilishadi. Maydonda 10 futbolchi bo‘lib qolgach, qiynalib qoldik. Deyarli 90 daqiqa davomida bir o‘yinchi kam bo‘lib o‘ynadik. Buning ustiga tarkibimizda ko‘pchilik o‘yinchilar yoshlar. Bunday paytda Superliga vakiliga qarshi to‘p surish qiyin. “Sho‘rtan” jamoasini g‘alaba bilan tabriklaymiz.

- Jamoada mag‘lubiyatlar kuzatilmoqda. Asosiy e’tibor faqat yoshlarga qaratiladimi yoki boshqa vazifalar ham bormi?

- Bizda asosiy vazifa yoshlarni tarbiyalash. Vazifa jiddiyroq bo‘lsa, shunga yarasha yaxshiroq yoshlarni tanlash kerak. Biz yil boshida mavsumga bir oy qolganida yig‘ildik. Tarkibimizda yoshlardan tashqari 3-4 nafar yoshi katta o‘yinchilar bor. Ular sheriklariga yordam beradi va tartib-intizom ham birinchi o‘rinda turadi. Yoshlarga imkoniyat berilsa, yaxshi saviyada o‘ynab ketadilar. Ularni shu maqsadda tarbiyalayapmiz. Biz asosan jamoasiz qolgan yoshlarni to‘plaganmiz. Moliyaviy tomondan u qadar kuchli emasmiz.

- Demak, mavsum yakunigacha jamoaga yangi keladiganlar yoki ketadiganlar bo‘lmaydi, shu tarkib ushlab turiladimi?

- Birinchi davradan so‘ng ba’zi o‘yinchilarni almashtiramiz. Futbol o‘ynashga maksimal xohish bo‘lmayapti. Menda shunaqa taassurot uyg‘otyapti. Baribir o‘zgarish bo‘ladi, ikkinchi davrada. Xohlamasa ushlab turmaymiz, javob beramiz.

- Demak, moddiy barqarorlik bo‘lmaganidan keyin natijalar ham shunga yarasha bo‘ladi, shundaymi?

- Ha, bizda maksimal natija bo‘lishi uchun moddiy holat ham maksimal bo‘lishi kerak. Ta’kidlaganimdek, bizda moliyaviy imkoniyatimiz u qadar katta emas. O‘yinchilarning oylik maoshlari kam. Biz futbolchilarga hozir faqat pulni o‘ylamasdan futbol o‘ynashni o‘rgatyapmiz. Xudo xohlasa, yaxshi  tarbiyalasak va yaxshi jamoalarga ketishsa, pulni o‘zlari topib olaverishadi.

- G‘uzorga yana futbol qaytdi. Maydonda sinov tariqasida o‘yin o‘tkazilyapti. Futbolchilar bu maydonda o‘zlarini qanday his qilishdi? Maydon holati yaxshimi?

- Ikki yil oldin “Lokomotiv” bilan kelganman. O‘shanda maydon sifati yaxshi edi, hozir ham yaxshi. Yigitlarga yoqdi. Faqat futbol o‘ynash kerak. “Sho‘rtan”ga moliyaviy tarafdan yanada yaxshi e’tibor berilsa, rivojlanib boradi. Sharoitlari yaxshi.