"Navbahor" G‘ulomovni o‘zida saqlab qoldi

Yakuniga etgan mavsumni sermahsul o‘tkazgan yarim himoyachi Abbos G‘ulomov "Navbahor"da qoladigan bo‘ldi. Bu haqida klub matbuot xizmati xabar berdi.

Bugun klub qarorgohiga Namangan viloyati hokimi, viloyat futbol assotsiatsiyasi prezidenti Shavkatjon Shokirjanovich Abdurazzoqov tashrif buyurdi.

Jamoa prezidenti Anvarjon Abduvohidovich Tojimirzaev bilan birgalikda "Navbahor" safida yakunlangan mavsumda klub sharafini himoya qilgan futbolchilar orasidan etakchilarni kelasi mavsumda ham "lochinlar" tarkibida olib qolish masalasi muhokama qilindi.

Bosh murabbiy Timur Tohirovich Kapadze taqdim etgan short-list asosida jamoa safida sermahsullik ko‘rsatib, yakunda "Navbahor"ning yakunlangan mavsumdagi eng yaxshi o‘yinchisi va PFL tomonidan 2025 yilgi mavsumning "Yil kashfiyoti" deb e’tirof etilgan Abbosjon G‘ulomov bilan kelishuvga erishilib, u bilan tuzilgan amaldagi shartnoma muddati uzaytirildi.