Mashhur hujumchi yana Vinisiusning “po‘stagini qoqdi”

“Real”ning braziliyalik legioneri Vinisius Junior yana tanqidlarga nishon bo‘lmoqda. “Arsenal” va “Barselona”da o‘ynagan mashhur hujumchi Terri Anri 24 yoshli futbolchining Chempionlar ligasida “Liverpul” bilan o‘yindagi harakatlariga e’tiroz bildirdi.

 - Vinisius nega “Liverpul”ning qanot himoyachisiga bosim o‘tkazamaganini hech tushuna olmadim. Vaziyatga qarab boricha o‘ynash kerak.

Vinisius Konor Bredlini boshida besh-olti daqiqa pressing qildi va keyin qanotni raqib ixtiyoriga berib qo‘ydi.

Nega bunday qilasan? Nega raqibga hududlarni ochib beryapsan? Unga bosim o‘tkaz, sariq kartochka olishga majbur bo‘lsin, ana o‘shanda uning himoyasi bo‘shashadi va samarasi pasayadi. Lekin Vinisius bunday qilmaydi, - dedi Terri Anri.

Evropa Chempionlar ligasi umumiy bosqich to‘rtinchi turida “Liverpul” futbolchilari “Real” jamoasi ustidan 1:0 hisobida zafar quchdi. Yagona g‘alaba to‘pini Aleksis Mak Allister kiritdi.