Kechuv paytida otlar almashtirlmaydi yoxud "Bunyodkor"dagi ag‘dar-to‘ntarlarning asl sababi ma’lum

Xabaringiz bor, bugun "qaldirg‘ochlar" boshqaruvida bir nechta o‘zgarishlar yuz berdi. Klub direktori - Ulug‘bek Mirzaev o‘z ishini etarli darajada bajara olmagani vaj qilib ko‘rsatildi va lavozimidan ozod etildi. Shuningdek, Viktor Karpenko o‘rnini Ivan Boshkovichga topshirdi. Biz vaziyatni oydinlashtirish maqsadida, "Bunyodkor"ning sobiq direktori Ulug‘bek Mirzaev bilan bog‘landik.

Assalomu alaykum. Ulug‘bek aka, birdaniga bunday katta o‘zgarishlarning sababi nima?

- Kechagi "Neftchi"ga boy berilgan o‘yindan so‘ng, Mehriddin Abdullaevning sabr kosasi to‘ldi. Natijaga murabbiy javob bersa ham, printsiplar o‘zgargani yo‘q. Shu bois, men ham lavozimimdan ozod etildim. Jamoaga Aziz Haydarov direktor etib tayinlandi. Meni klubdan ketmasligimni aytib, tez orada boshqa lavozimga olishlarini aytdilar. Qaysi lavozimda ishni davom ettirishim, yaqin kunlarda hal bo‘ladi.

Bir o‘ylab qaralsa, natija uchun bosh murabbiy javob berishi tabiiy, ammo direktorni bu erda nima aybi bor? Agar klubning natijalari uchun klub rahbari pand esa, unda murabbiyni nima keragi bor? Bosh murabbiy, natija uchun ma’sul. U o‘yinchlarni yig‘ishi, jamoaviy o‘yinni qurishi kerak. Qaysi taktikada to‘p surish ham uning tanlovi. Bilmadim, shaxsan menda hech qanday muammo yo‘q edi. Tashkiliy ishlar borasida har doim vazifamni to‘liq ado etganman.

Nima  uchun aynan Aziz Haydarov varianti tanlandi?

- Aziz Haydarov 26 iyundan akademiyada ish boshlagan edi. Uni o‘zbek futbolidagi "avtoriteti" katta. Yaqin o‘tmishning yulduz futbolchilaridan biri. Klub prizidenti aynan shu vaj sababli klub prezidenti shu variantda to‘xtagan.

- Ivan Boshkovichning pro litsenziyasi bormi?

- Ha yaqinda o‘quv kurslari tugagan. May oylarida yurtimizda bo‘lgan pro litsenziyasi uchun o‘qishda Boshkovich eng yuqori ball to‘plab, pro litsenziyaga ega bo‘ldi. Eng qizig‘i shundaki, Viktor Karpenko o‘sha o‘quv imtihonlaridan o‘ta olmagan va 6 oydan so‘ng, qaytadan topshirgan edi. Undan farqli o‘laroq, Ivan birinchilardan bo‘lib professional klubni boshqarish imkoniyatini beruvchi hujjatga ega bo‘ldi.

- Mavsumning qolgan o‘yinlarida keskin o‘zgarishlar jamoaga salbiy ta’sir ko‘rsatmaydimi?

- Yaxshilanadi degan umidamiz. Asosiysi, qolgan 6 o‘yinda kerakli natijani qo‘lga kiritib, mavsumni yaxshi kayfiyatda yakunlash. Rejaga ko‘ra, kelasi mavsumda kuchli jamoa yig‘ib, katta maqsadlar sari intilmoqchimiz.

- Kechuvda otlar almashitrilmaydi. Bu qaror qanchalar to‘g‘ri deb o‘ylaysiz?

- To‘g‘risi, rahbarimizning qarorini muhokama qilmoqchi emasman. Biz qaror ijrosi bilan shug‘ullanishimiz lozim. "Bunyodkor"ning natijalari salbiy ekanligi rost. Bu omadsizlikka men va jamoa bosh murabbiyi javobgor bo‘lib, biz aybdor deb topildik. Buni to‘g‘ri qabul qilishimiz kerak.