Ilyos Zeytullaev: "Barchasini men bajardim desam noto‘g‘ri bo‘ladi"

“Bunyodkor” - “Andijon” (1:2) uchrashuvidan keyingi matbuot anjumanining ikkinchi qismida mezbonlar bosh murabbiyi Ilyos Zeytullaev ishtirok etdi.

- O‘yinni ko‘rdinglar, birinchi taymda “Bunyodkor” yomon o‘yin ko‘rsatmadi. Maydonni barcha qismida yaxshi harakat qildi. “Andijon” ham ijobiy taassurot qoldirdi va ular motivatsiya bilan o‘yin ko‘rsatishdi. Ular chempionatdagi o‘rnini saqlab qolish uchun kurashishdi. Bunday holatda bizda ham bo‘lgan. Qiyin vaziyatda jamoa borini berib o‘ynaydi. “Andijon”ni g‘alaba bilan tabriklayman. Superligada to‘g‘ridan-to‘g‘ri qolgani va keyingi yillarda kuchli jamoa sifatida shakllanishini tilab qolaman. O‘z yigitlarimni mavsumni yaxshi o‘tkazishgani bilan tabriklayman. Bizni ko‘rsatmalarimizni ortig‘i bilan bajarishdi. Murabbiy sifatida ularni mehnatini olqishlayman. Biz mavsumni munosib o‘tkaza oldik. O‘ylaymanki, o‘yinchilar meni tushunishyapti. Yaxshi mehnat qilishgani uchun rahmat aytaman. Rahbariyatga ham minnatdorchiligimni bildiraman.  

- Mavsumdan qoniqqanligingizni aytyapsiz. Lekin qaysidir jihatlaridan ko‘ngligiz to‘lmagan holatlari ham bo‘ldimi?

- Aytishim mumkinki, holi o‘tirib barchasini muhokama qilish imkoniyati bo‘ladi. Xato va kamchiliklarimiz bo‘ldi. Biz yanada zo‘r bo‘lishimiz ham mumkin edi. Bir qator muammolar ham kuzatildi. Lekin umumiy ma’noda yaxshi va maydonda, maydon tashqarisida jamoa yakdil bo‘lib ijobiy tomonini ko‘rsatdi. Biz kichkina yo‘lni bosib o‘tmadik. O‘zbekiston chempionatida 5-o‘rinni egallash ham yomon ko‘rsatkich emas. Kuchli uchlikda yakunlagan klublar o‘zbek futbolini gigantlari hisoblanadi. O‘ylaymanki, “Dinamo” ham kuchlilar qatoriga qo‘shildi. Undan keyin esa biz egalladik. Xulosa chiqarib ishimizga jiddiy yondashamiz. Rahbariyat bilan gaplashamiz. Qaerda xato qilganimizni ko‘rib chiqamiz. Tarkibimizga yosh o‘yinchilarni qo‘shdik. Bu jamoaga poydevor vazifasini bajarib beradi. Ularga imkoniyat beryapmiz. Albatta, bu jarayonlar oson bo‘lmayapti.

- Turnir jadvalidan kelib chiqib aytganda, o‘z ishingizga qanday baho berasiz?

- Boshqalar baho bergani yaxshi. G‘alabalar barchani mehnati. O‘yinchilarsiz yoki murabbiylarsiz buni tasavvur qilish qiyin. Birinchi o‘ringa jamoani qo‘yaman. Oldimdagi media xodimimizni, oshpazlarni, massajchilarni, ishlayotgan barcha insonlarni ham ta’kidlab o‘taman. Albatta, meni ishim ham oson emas. Rahbariyatga va barchaga minnatdorchiligimni bildiraman. Akademiyamizga ham iqtidorlarni etishtirib berayotgani uchun rahmat. Barchasini men bajardim, desam noto‘g‘ri bo‘ladi. Hammasini birgalikda bajaradik.

- Keyingi mavsumda jamoa kuchli uchlikka harakat qiladimi? Ya’ni, kuchli uchlikka kiradigan “Bunyodkor”ni ko‘ramizmi?

- Savolni berib, javobini ham o‘zingiz beryapsiz. Bu savolni rahbariyatga bergan ma’qulroq. Top darajadagi futbolchilarni qanday jamoalar sotib olayotganini ko‘rib turibmiz. Evropani grandlari mavsum boshida top futbolchilarni tarkibiga qo‘shib oladi. Biz o‘z yo‘limizda ketishimiz kerak. Yaxshi poydevor qo‘ygan holda aniq maqsad sari odimlashimiz lozim.