G‘alaba qozongan "Olimpik" ustozi nimadan xafa bo‘lganini bilasizmi?

Pro liganing 5-turidan o‘rin olgan Toshkentning "Olimpik" hamda Farg‘onaning "FarDU"  jamoalari o‘rtasidagi o‘yin ancha qiziqarli va hujumkor ruhda o‘tdi. Ushbu o‘yinda Mirko Elichich boshchilik qilayotgan "Olimpik" 2:1 hisobida ustun keldi.

Shuni aytish lozimki. "Olimpik" uchun pro ligadagi startni omadsiz boshlandi. Jamoa ketma-ket uchta uchrashuvda imkoniyatni boy berdi. Shundan keyingina jamoa o‘ziga kelishni boshladi. O‘tgan turda musobaqada "Lokomotiv"dan keyingi favorit hisoblangan "Aral"ning maydonida 1:0 hisobida yutib qaytdi. Bu safar esa "FarDU" taslim etildi. Demak, "Olimpik" vaziyatni to‘g‘rilayotgani ko‘rinib turibdi. 

Jamoa bosh murabbiyi Mirko Elichich aynan "FarDU"ga qarshi bo‘lib o‘tgan o‘yindan so‘ng fikrlari bilan o‘rtoqlashdi.

- Bugun murakkab o‘yin bo‘lishini bilardik. Hozir Pro ligada deyarli hamma jamoalarning darajasi bir xil. Jismoniy jihatlarga urg‘u qaratilgan kurashlar bo‘lishidan xabardor edik. Biz 80-daqiqagacha o‘z o‘yinimizni ko‘rsatishga harakat qildik. 2:0 dan so‘ng yigitlar bo‘shashishdi va ularning o‘yiniga moslashishimizga to‘g‘ri keldi. Bolalar yosh bo‘lishlariga qaramay, astoydil kurashdi va g‘alaba qozondi. 

- "Olimpik" birinchi taymda yorqin o‘yin ko‘rsatdi, ikkinchi bo‘limda esa vaqt asosan kurashlarga sarflandi...

- "FarDU" tarkibida asosan bo‘yi uzun va jismonan kuchli futbolchilar yig‘ilgan. Ular 2:0 dan keyin shunaqa futbol o‘ynashga o‘tdi. Uzun paslarni ko‘p amalga oshirishdi. Biz o‘z futbolimizni ko‘rsatishga urindik, epizodlarda kurashdik, boshqa ilojimiz ham yo‘q edi. Raqib ham kuchli tomonini ko‘rsatishga harakat qiladi. Biroq O‘zbekistonda "toza" va texnik futbol namoyish etishmayotganidan xafaman. Texnik futbolchilari bo‘lmagani uchun ular uzun paslar va jismoniy tarafga urg‘u qaratishdi. Tarkibimizda uch nafar yoshi katta futbolchi bor, boshqalar akademiyadan chiqqan va kattalar darajasida futbol o‘ynamagan. Akademiyadan chiqqan yigitlar bunday kurashlarga hali moslashmagan, bu ularga yaxshigina tajriba, dars bo‘lmoqda.