Fayzullaev Evropaning grand klubiga o‘tishini istashyapti!
- 24-август 2024, 18:43
- Zohir Toshxo’jayev
- 1
- Futbol
O‘zbekiston Superligasida ishtirok etayotgan 14 ta klub joriy chempionat uchun jami 370 nafar charm to‘p ustasini musobaqa ro‘yxatidan o‘tkazgan.
Ular orasida Evropa, Osiyo va Afrikaning 22 mamlakatidan jami 70 nafar legioner bor. Eng ko‘p futbolchi Serbiyadan kelgan. Ularning soni 13 ta. Keyingi o‘rinda o‘nta tarbiyalanuvchisini jo‘natgan Rossiya turibdi. Kuchli uchlikni 8 nafar futbolchiga ega Gruziya yakunlagan.
Rossiyalik futbolchilardan to‘rt nafarini “Surxon” o‘ynatyapti. Ulardan biri – “Zenit” tarbiyalanuvchisi Dmitriy Pletnyov Rossiyaning nufuzli nashrilaridan biri championat.com saytiga bergan intervyusida uning yurtida o‘ynayotgan o‘zbek futbolchisi Abbosbek Fayzullaev haqida ham fikr bildirdi.
Sports.uz portali Pletnyov intervyusida Abbosbek Fayzullaev haqidagi savol-javoblar qismini o‘zbekiston futbol muxlislari e’tiboriga havola qiladi.
— Hozir O‘zbekistonda eng mashhur yulduz Abbosbek Fayzullaevmi?
— Albatta, u haqida ko‘p gapirilyapti. Bu erda Abbosga juda ko‘p qayg‘urishadi, o‘zi ham o‘sishishi, o‘zbek futbolchini rivojlantirishini, mamlakatda O‘zbekistonning va sportning timsoli bo‘lishini istashadi.
Shuningdek, Abbosbek Fayzullaevning grand klubga o‘tishini ham xohlashyapti.
— Rossiyadan tashqari, Mustaqil Davlatlar Hamdo‘stligining uchta vakili – Belarus, Qozog‘iston va O‘zbekistonda o‘ynagansiz. Ularni kuchiga qarab, ajratib bering.
— O‘zbekiston va Qozog‘iston chempionatlari bir-biriga o‘xshash. Qozog‘iston chempionatida kuchga asoslangan kurashga ko‘proq e’tibor qaratiladi. Lekin har ikki chempionat juda yaxshi darajada. Shundan kelib chiqib, Belarus chempionati uchinchi o‘rinda.
— Yoshingiz 26 da. Oldinda qanday istiqbol va maqsadlar qo‘yilgan?
— Uzoq kelajakka qaratilgan maqsadlarni qo‘ymayman. Har kuni kechagi kunga qaraganda yaxshiroq bo‘lishga harakat qilaman. Maqsadim maydonda o‘z mahoratimni ko‘rsatish, samarali harakatlarim bilan jamoamning g‘alabalarini ta’minlashga munosib xizmat qilishdan iborat.
Eslatib o‘tamiz, Abbosbek Fayzullaev o‘tgan yilning avgust oyida “Paxtakor”dan Rossiya Premer-ligasi vakili TsSKA safiga ko‘chib o‘tgan edi.
Hamyurtimiz legioner sifatidagi ilk mavsumida Rossiya Premer-ligasining asosiy kashfiyoti bo‘ldi va maxsus sovrin bilan taqdirlandi.
20 yoshli hujumkor futbolchimizning bugungi kundagi transfer narxi 6 million evroni tashkil qilmoqda va bu ko‘rsatkich bo‘yicha Markaziy Osiyoning eng qimmatbaho o‘yinchisi hisoblanadi.
Dmitriy Pletnyov esa, yurtimizda 2024 yilning 12 fevralidan beri faoliyat ko‘rsatmoqda. “Surxon”ning hujumkor futbolchisi, maydon markaziy va hujum chizig‘ining har ikki qanotida samarali o‘ynay oladi.
Rossiyalik charm to‘p ustasi faoliyati davomida o‘z yurtida “Zenit”, “Tom”, “Baltika”, “Dinamo Sankt-Peterburg”, Qozog‘istonda “Atirau”, Belarusda “Arsenal” va “Slutsk” jamoalarida to‘p tepgan.
Dmitriy Pletnyov joriy mavsum O‘zbekiston Superligasi va mamlakat kubogi musobaqalarida jami 19 ta uchrashuvda ishtirok etib, ikkita gol va bitta assist muallifi bo‘ldi.