Dzyudochilarimiz 70 ta medalni qo‘lga kiritdi!

To‘rt kun davomida Toshkent shahri ramziy ma’noda Osiyo qit’asi dzyudosining poytaxti maqomida bo‘ldi.

Muhtasham "Alpomish" muz saroyida yuqori saviyada tashkil etilgan turnirda dunyoning o‘ndan ortiq davlatidan jami 835 nafar dzyudochi ikki yosh toifasida medallar uchun bahs olib bordi. Kadetlar o‘rtasidagi musobaqada jami 514 (345 o‘smir, 169 qiz), yoshlar o‘rtasida esa 321 (222 o‘g‘il bolalar, 99 qizlar) dzyudochi o‘zaro bellashdi. 

To‘rt kun mobaynida bevosita arenadan musobaqani kuzatib borgan Xalqaro dzyudo federatsiyasi (IJF) hamda Osiyo dzyudo ittifoqi (JUA) mutasaddilari Uchqun Murodov xotirasiga bag‘ishlab o‘tkazilgan "Tashkent Cadet and Junior Asian Cup 2025" turnirining tashkiliy jihatlariga yuqori baho berishdi. 

Ahamiyatlisi, o‘z tarixida yubiley 30-marotaba tashkil etilgan ushbu turnirda O‘zbekiston o‘smirlar va yoshlar terma jamoalari roppa-rosa 70 ta  medal qo‘lga kiritishdi. Kadetlarimiz 10 ta oltin, 10 ta kumush, 18 ta bronza, jami 38 ta medalga ega chiqishdi. Yoshlarimiz esa O‘zbekiston delegatsiyasiga 9 ta oltin, 9 ta kumush, 14 ta bronza, jami 32 ta medalni taqdim etishdi.

Bu haqda O‘zbekiston dzyudo federatsiyasi xabar bermoqda.