Bahrom Mendiboev: Akbar Jo‘raev ham mashg‘ulotlarga qaytdi

Yil yakunida og‘ir atletikachilarimizni mas’uliyatli musobaqalar kutib turibdi. Kattalar terma jamoamiz Bahrayn mezbonlik qiladigan jahon chempionatiga tayyorlanayotgan bo‘lsa, o‘smirlar va yoshlar jamoalarimiz Qatarda o‘tadigan qit’a birinchiligida ishtirok etishadi. Asosiy terma jamoa bosh murabbiyi Bahrom Mendiboev O‘zbekiston Milliy Olimpiya qo‘mitasi matbuot xizmatiga bo‘lajak startlar oldidan o‘z fikrlarini bildirib o‘tdi.:

– Olib borilayotgan yig‘in ko‘ngildagidek ketmoqdami?
– Hozir barcha terma jamoalarimiz Chirchiqdagi bazada o‘quv-mashg‘ulot yig‘inlarini olib boryapti. Hozirgi yig‘inimiz ikkinchi bosqichda bo‘lib, bazaviy texnikalarni oshirish ustida ishlayapmiz.

– Jahon chempionati uchun tarkib aniqmi? Unda Akbar Jo‘raevni ham ko‘ramizmi?
– Akbar kichik tanaffusdan keyin mashg‘ulotlarga qaytgan. Hozirda yakka tartibda o‘zi engil mashg‘ulotlarni o‘tkazyapti. Agar musobaqagacha o‘zining optimal sport formasiga kira olsa, uni ham tarkibga kiritishimiz mumkin. Rejaga ko‘ra, 15-noyabrda nazorat mashg‘ulotimiz bor. Unda dunyo birinchiligiga tayyorlanayotgan hamma nomzodlar xuddi musobaqadagidek tosh ko‘tarishadi. Terma jamoaning yakuniy tarkibi va kimning qanday holatda ekani shu vaqtda aniq bo‘ladi.