"Andijon" yubiley g‘alaba ostonasida yoxud "Burgutlar"ning milliy chempionatimizdagi statistik raqamlari qanday?

O‘zbekiston milliy chempionati boshlanganidan beri klublarning umumiy ishtiroki hamda statistik raqamlari ko‘pchilikni qiziqtirishii turgan gap. Jumladan, “Andijon” jamoasining statistik raqamlari qanday ko‘rinishda ekanligi muxlislarni befarq qoldirmaydi. Yodingizda bo‘lsa, birinchiligimiz avvaliga oliy liga deb nomlangan, keyinchalik Superligaga o‘zgartirilgan. O‘zbekiston birinchiligi o‘tkazib kelinayotganidan beri jamoa 27-mavsumini o‘tkazmoqda.

“Andijon” klubi O‘zbekiston chempionatida shu kungacha 791 ta o‘in o‘tkazdi. Shundan 249 tasida g‘alaba, 165 ta durang hamda 377 ta bahsda mag‘lubiyat qayd etilgan. To‘plar nisbatiga kelsak, “Andijon” O‘zbekiston chempionatlari davomida jami 1029 ta gol urgan va o‘z darvozasidan 1283 ta to‘p o‘tkazib yuborgan.

“Andijon”ning O‘zbekiston chempionatidagi yubiley g‘alabalari

Ilk g‘alaba: 05.04.1992. “Navro‘z” – “Yangier” – 2:1

50-g‘alaba: 28.08.1996. “Navro‘z” – “Dinamo” (Urgench) – 3:0

100-g‘alaba: 26.08.2000. “Surxon” – “Andijon” - 0:5

150-g‘alaba: 20.05.2006. “Andijon” – “Qizilqum” – 5:3

200-g‘alaba: 02.04.2011. “Andijon” – “Mash’al” – 4:0

E’tibor bergan bo‘lsangiz, jamoa a’zolari yubiley g‘alabalarida minimum 2 ta maksimum 5 ta gollar urishgani e’tiborga molik.

Jizzaxda “So‘g‘diyona” ustidan qozonilgan g‘alaba “Andijon”ning 249-g‘alabasi sifatida tarixda qoldi. Agar 22 noyabr kuni Yaypanda “Turon” mag‘lub etiladigan bo‘lsa, “Burgutlar”ning yubiley 250-g‘alabasiga aylanadi.

Shuningdek, urilgan gollarni ham yuqorida keltirib o‘tdik. Hozirga qadar raqiblar darvozasiga 1029 ta to‘p kiritilgan. Jamoaning yubiley 1000-goli 2021 yilgi mavsumning 25 sentyabr kuniga to‘g‘ri keladi. 20-tur doirasida safarda “Qo‘qon-1912”ga qarshi bellashuvda 1:1 hisobi qayd etilgan. O‘sha paytdagi klubning belaruslik legioneri Vasiliy Sovpel 55-daqiqada raqib darvozasini chiroyli tarzda ishg‘ol etgan va bu “Andijon”ning O‘zbekiston chempionatlaridagi yubiley 1000-goliga aylangan.

O‘zbekiston chempionatlarining umumiy jadvalida “Andijon” 43 ta jamoa orasida 8-o‘rinni egallab turibdi. Shu kungacha to‘plagan ochkosi esa 912 tani tashkil qilmoqda.