Odil Ahmedov: Osiyo kubogida 100 ta gol urib, 100 ta golli pas berishni xohlayman

Terma jamoamiz sardori Odil Ahmedov kutilganidek Turkmanistonga qarshi uchrashuvda ham o‘z vazifasini a’lo darajada bajardi va muxlislarning olqishiga sazovor bo‘ldi. O‘yindan keyin u stadionda va miks-zonada bir qator jurnalistlarga intervyu berdi. Oxiri bo‘lib esa xitoylik muxbir undan intervyu oldi. Ushbu suhbatni e’tiboringizga havola qilamiz.

- O‘yin haqida nima deysiz?

- Bugun g‘alaba qozonib, muxlislarimizni xursand qilganimizdan o‘zimiz ham quvondik. Mana shunday g‘alabalarimiz davomli bo‘lishini istayman.

- Ikkita gol urgan Eldor Shomurodov chiroyli o‘yin ko‘rsatdi. U haqida fikringiz qanaqa?

- Uning kelajagi porloq. O‘ylaymanki, Eldor o‘z ustida ishlashda davom etsa, bundan ham yaxshi o‘yin ko‘rsata oladi. Uni O‘zbekistonning eng yaxshi hujumchilaridan biri bo‘lishini xohlayman.

- Klub bilan milliy terma jamoa o‘rtasidagi farq qay darajada?

- Klub bilan terma jamoa boshqa-boshqa. Ikkalasini tenglashtirib bo‘lmaydi. Baribir milliy terma jamoa klubga nisbatan yuqorida turadi.

- Siz bilan birga bir klubda to‘p surayotgan Vu Ley haqida nima deya olasiz?

- Uni Xitoy futbolchi uchun eng zo‘ri deb bilaman. U bilan birga o‘ynash kishiga zavq bag‘ishlaydi. Vu Ley yanada o‘sishga erishyapti.

- Afsuski, u jarohat oldi…

- O‘ylaymanki, jarohati jiddiy emas.

- Ushbu musobaqada nechta gol urishni va nechta golli pas berishni xohlaysiz?

- Musobaqada 100 ta gol urib, 100 ta golli pas berishni xohlayman (kuladi).

- Birinchi uchrashuvda kiritgan golingiz haqida fikringiz qanday?

- Gol urish doimo yoqimli. Eng muhimi, jamoamiz g‘alaba qozonsa bo‘ldi.

- Osiyo Kubogini yutmoqchimisiz yoki qaysidir bosqichgacha etib borishni maqsad qilganmisiz?

- Bu erga yutamiz deb kelganmiz. Xudo xohlasa, o‘z maqsadimizga erishamiz.

Shuhratbek Jo‘raev yozib oldi.