Уларни эслаб қолинг! Машҳур агент қайси ўзбек футболчиларига эътибор қаратишни айтди
Ўзбекистонда иқтидорли футболчилар доим кўп бўлган. Бироқ кейинги пайтда ўзбек футболи тарбияланувчилари Европанинг топ-лигаларидаги клублари эътиборини тортаётгани ҳам бор гап.
Элдор Шомуродов қарийб беш йилдан бери Италия тўп тепяпти. 29 ёшли ҳужумчи Европа “топ-5” лигаларида энг кўп ўйин ўтказган, биринчи ва энг кўп гол урган илк ўзбек футболчиси сифатида ўз номини тарихга ёздириб қўйди.
Янги авлод вакили – Абдуқодир Ҳусановнинг дастлаб Франциянинг “Ланс” клубида ўйнагани ва 2025 йилнинг 20 январида дунёга машҳур клуб “Манчестер Сити”га ўтгани ҳам ўзбек футбол мактаби учун яхшигина реклама бўлди. Бунга Муҳаммадали Ўринбоевнинг “Брентфорд” клуби ёшлар жамоасида тажриба оширган ва Лазизбек Мирзаевнинг испан клуби – “Леганес” ёшлар жамоасига ўтганини ҳам қўшиш мумкин.
Ўзбекистон ўсмирлар ва ёшлар ўртасидаги қитъа ва жаҳон чемпионатларида муваффақиятли иширок этиб келаётгани ҳам жаҳондаги клублар скаутлари ва селекционарларини мамлакатимиз футбол бозорини кузатишга ундамоқда.
Элдор Шомуродов ва Аббосбек Файзуллаев каби юлдузлар манфаатини ҳимоя қилаётган Prosports Manaqement агентлиги раҳбари Герман Ткаченко “Nobel” YouTube-каналидаги чиқишида ўзбек футболида яна янги номлар пайдо бўлганини ва уларга эътибор қаратиш лозимлигини таъкидлади.
Гап шундаки, Ўзбекистон U-17 терма жамоаси яқинда Саудия Арабистони мезбонлик қилган Осиё кубогида ғолиб чиқди. Финалда иккита ўйинчи кам қолганига қарамай, терма жамоамиз саудияликларни 2:0 ҳисобида мағлуб этиб, қаҳрамонлик кўрсатди. Ткаченко мана шу жамоада бир неча салоҳияти катта ўйинчилар борлигини айтди.
- Ўзбекистон бизга кўплаб талантли футболчиларни етказиб беряпти. Айниқса, 2008 йилда туғилган футболчилардан иборат жамоа – ўта ажойиб. Улар яқинда Саудия Арабистонида бўлиб ўтган Осиё кубоги финалида мезбонларни тўққиз киши бўлиб ҳам таслим қилди. Жуда кучли жамоа тузилган.
Бу жамоадан мижозларимиз кўп. Бу янги тўлқиндаги ўйинчилар. Масалан , Ҳасанов (“Бунёдкор” ҳужумкор футболчиси Садриддин Ҳасанов – sports.uz). Уни Ҳусанов билан адаштирманг.
Бу номларни эслаб қолинг!
Яна бири Осиё кубогининг энг яхши ўйинчиси ва энг зўр тўпурари Алиев (15 ёшли Асилбек Алиев тўртта учрашувда бешта гол урди – sports.uz). Таркибда яна жамоа сардори Мўмин (Мўминхон Баҳодирхонов – sports.uz) бор.
Бу жамоада бошқа зўр йигитлар ҳам бор. Мен уларнинг барини яхши билан, уларни кузатиб бораман, улар устида ишлайман, - деди Герман Ткаченко.
Эслатиб ўтамиз, Ислом Исмоилов бош мураббийлигида Ўзбекистон U-17 терма жамоаси қитъа чемпиони сифатида энди шу йилнинг ноябрь ойида Қатар мезбонлик қиладишан жаҳон чемпионатида иштирок этади.
Экспертларнинг таъкидлашича, бу турнирда ҳам қатор клубларнинг скаутлари, селекционерлари, мураббийлари ва мутахассислар дунёнинг олтита қитъасидан келган истеъдодли ёш ўйинчилар қатори ўзбекистонлик талантларни ҳам кузатиб боради.
Фикрлар