Спалетти: "Ювентус"ни яна чўққига олиб чиқишни истайман"

Кеча Лучано Спалетти Турин клуби билан 2026 йил ёзигача шартнома имзолади. Агар жамоа Чемпионлар лигасига йўл олса, келишув яна икки йилга узайтирилиши мумкин. Бугун эса янги бош мураббийнинг расмий тақдимоти бўлиб ўтди.

"Менда жуда яхши ҳис туйғуси бор. Биз бу клубнинг тарихи ва тизимини яхши биламиз. Кутилмалар юқори, лекин бундай жамоага қўшилиш — ҳамиша шараф.

Ҳозирда асосий мақсад — "Ювентус"ни яна чўққига қайтариш. Шу билан бирга, лигадаги ҳозирги ҳолат ва Тудорнинг меҳнатини катта ҳурмат билан қабул қиламан. Мен яхши тайёргарлик кўрган ва психологик жиҳатдан кучли жамоани топишимга ишонаман. Албатта, олдинга қадам қўйиш учун жуда кўп ишлашимиз керак.

Бу ерга келиш сабабим бошиданоқ аниқ эди. Агар жамоанинг салоҳиятига ишонмаган бўлсам, нега саккиз ойлик шартномани қабул қилардим? Шунинг учун улар билан яхши ишлай олишимга ишонаман. Биз Чемпионлар лигасига қайтиш учун бор кучимизни сарфлашимиз керак, чунки бошқалар тез суръатда илгарилаяпти.

Умид қиламанки, биз скудетто учун курашга ҳам қайта оламиз — бу ҳақда футболчилар билан ҳам гаплашдик. Олдимизда ҳали 29 та ўйин бор, демак, энг яхши натижа учун курашишимиз шарт", — деди Спалетти.

Аввалроқ жамоа бош мураббий Игор Тудор билан хайрлашган эди. Ҳозирда жамоа А Серия жадвалида 15 очко билан 7-ўринда бормоқда.