Шахмат. Жаҳон чемпионатида кумуш медаль!

Хабар берганимиздек, жорий йилнинг 3–16 октябр кунлари Албания давлатининг Дуррес шаҳрида 14, 16 ва 18 ёшгача бўлган ўғил болалар ҳамда қизлар ўртасида шахмат бўйича Жаҳон чемпионати бўлиб ўтди.

Ўзбекистонлик иқтидорли шахматчи Олимова Руқия 14 ёшгача қизлар ўртасидаги Жаҳон чемпионатида муносиб натижа қайд этди!

У 11 имкониятдан 9 очко тўплаб, дунёнинг 107 нафар иқтидорли қизлари орасида кумуш медаль соҳибасига айланди!

Бу ютуқ нафақат Руқиянинг, балки бутун Ўзбекистон шахматининг фахридир. Юртимиз шарафини юксак даражада ҳимоя қилган спортчимизни чин дилдан табриклаймиз!