Shahobiddin Zoirov final ostonasida to‘xtadi

Bugun, Iordaniyada davom etayotgan litsenzion turnirning yarim final bahslariga start berildi. Xabaringiz bor, o‘zbekistonlik bokschilarning 6 nafari bu bosqichda o‘z janglarini o‘tkazadi. Ular orasida birinchi bo‘lib, Olimpiada chempioni Shahobiddin Zoirov ringga ko‘tarildi. U final yo‘lida tailandlik Titisan Panmot bilan bahs yuritdi. Allaqachon Tokio Olimpiadasiga yo‘llanmani qo‘lga kiritgan hamyurtmiz, jangda odatdagidek faol bo‘lgandi. Lekin hakamlar boshqacha qarorga kelishdi va ustunlikni Tailand vakiliga berishdi. Yurtdoshimiz Tokio Olimpiadasiga yo‘llanma hamda turnirning bronza medali sohibiga aylandi.