Nursulton Ro‘ziboev vazn me’yorini bajardi. Ertaga jang!

Yurtimizning eng ko‘zga ko‘ringan MMA jangchilaridan biri Nursulton Ro‘ziboev ertaga navbatdagi jangini o‘tkazadi.

U Rossiyaning Samara shahrida “Open Fighting Championship” turniri doirasida ukrainalik Bogdan Kotlovyanovga qarshi oktagonga ko‘tariladi. Bugun ushbu jang avvalidagi vazn o‘lchash marosimi bo‘lib o‘tdi va yurtdoshimiz belgilangan vazn me’yorini bajara oldi. Ya’ni, Nursulton o‘rta vazn (77-84 kg) toifasida jang qiladi.

Shu o‘rinda ta’kidlab o‘tish lozimki, hamyurtimiz bu promoushenda debyut qiladi. Mazkur muhim jangda yurtdoshimizga omad yor bo‘lishini tilab qolamiz!