Моуриньо “Рома” етакчисини Римда қолишга кўндирди

Италиялик ярим ҳимоячи Николо Заньоло "Рома"ни тарк этиш ҳақидаги фикрини ўзгартирди, деб хабар беради “Sport Mediaset” нашри.

Манбанинг ёзишича, футболчининг бундай қарорга келишига жамоа бош мураббийи Жозе Моуриньо билан бўлган суҳбат таъсир қилган. Португалиялик мутахассис Николо билан гаплашди ва уни Италия пойтахтида қолишга кўндирди.

Сўнгги бир неча ой ичида Заньоло Туриннинг "Ювентус" клубига ўтиши мумкинлиги ҳақида хабарлар тарқалган эди. “Кекса синьора” футболчи учун 50 миллион евро тўлашга тайёр эканлиги айтилганди.

Николо ўтган мавсумда “Рома”нинг А Серия доирасидаги 28 та ўйинда майдонга тушиб, ўз ҳисобига 2 та гол ва 2 та голли узатмани ёздириб қўйган. Футболчининг “бўрилар” билан шартномаси 2024 йилнинг ўрталарига қадар амал қилади.