Ҳусанов жамоаси қарорини ўзгартириши кутиляпти

7 май, 11:33
Zohir Toshxo’jayev
0
Футбол

“Манчестер Сити” учун мавсумнинг ҳал қилувчи палласи бироз ижобий давом этмоқда. Хосеп Гвардиола шогирдлари бир неча муҳим очколарни қўлга киритиб, учинчи ўринга кўтарилиб олди.

Гарчи “Ливерпуль” муддатидан олдин чемпионликни расмийлаштириб, бу унвонга тўрт йил эгалик қилган “Манчестер Сити”дан уни тортиб олган бўлса-да, “шаҳарликлар” назарий жиҳатдан иккинчи ўринга кўтарилиб олиш имконига эга.

Бунинг учун Хосеп Гвардиола шогирдлари қолган учта учрашувда максимал очко тўплаб, уч очко илгарилаб кетган “Арсенал”нинг мағлуб бўлишини кутишга мажбур. “Канонирлар”нинг одатдагидек, чемпионат охирида чарчаб қолгани ва қимматли очколарни йўқотаётгани “Сити” вакилларида иккинчи ўринни эгаллаш умидини уйғотди.

“Арсенал” кетма-кет бешта учрашувдан тўрттасида очко йўқотди. “Манчестер Сити” эса, бу турларда тўртта ғалаба ва битта дуранг қайд этди.

“Манчестер Сити”нинг сўнгги ўйинлардаги муваффақиятларига Кевин де Брюйне жуда катта ҳисса қўшяпти. Яқинда бельгиялик футболчи мавсум якунланиши билан клубни тарк этишини билдирганди.

Бир ойдан кейин 34 ёшга тўладиган плеймейкер кетиши кераклигини клуб у билан янги шартнома тузмаликка қарор қилганидан кейин тушуниб етганини айтганди. Бироқ ҳозир вазият ўтганди. Ҳали юқори савияда ўйнай олишини исботлаган ўйинчи клуб хўжайинлари қарорини ўзгартириб, унга янги шартнома таклиф қилишини кутяпти.

Кевин де Брюйненинг ўзи ҳам агар клубдан таклиф бўлса, кетиш фикридан қайтиши мумкинлигини таъкидламоқда. У ўзини юқори даражада ўйнашга қодир, деб ҳисоблаяпти.

2015 йилдан бери “Манчестер Сити”да тўп тепаётган легионер ҳозирга қадар 418 та учрашувда қатнашиб, рақиблар дарвозасига 108 та тўп киритган ва жамоадошларига 177 маротаба ассистентлик қилган. Give Me Sport нашрининг маълум қилишича, айни пайтда тажрибали ўйинчи клуб қарорини ўзгартиришини интизорлик билан кутяпти.

Гвардиола ўзини қийнаган мураббий номини айтди

“Манчестер Сити” бош мураббийи Хосеп Гвардиола ўтган йили ёзда “Ливерпуль”ни тарк этган германиялик мутахассис Юрген Клопп ҳақида фикр билдирди.

- Мураббийлик фаолиятим давомида энг қийин синов Юрген Клоппнинг “Ливерпуль”и билан рақобатлашиш бўлган. Юрген туфайли ҳар доим бош оғриғига дучор бўлганман.

Мен мураббийлар хонасида Клоппни қандай тўхтатиш ҳақида бош қотириб, жуда кўп вақт ўтказардим.Фаолиятим давомида ундан кучли рақиб бўлмаган, - деди Хосеп Гвардиола.

Ҳар икки мураббий Англия Премьер-лигасидаги фаолиятини деярли бир пайтда бошлаган. Испаниялик мутахассис Манчестерга 2016 йили келган бўлса, немис мураббийи 2015-2024 йиллар давомида “Ливерпуль” устози сифатида ишлаган. Айни пайтда Клопп Red Bull компанияси раҳбарларидан бири бўлиб фаолият кўрсатмоқда.

“Сити” рақиб футболчисини олиб қўймоқчи

“Манчестер Сити” мутасаддилари рақиб жамоалар таркибида ўйнаётган ўйинчилар орасида Хосеп Гардиола услубига мос тушадиган футболчиларни ҳам кузатиб келмоқда.

Айна шундай ўйинчилардан бири “Ноттингем Форест”дан топилди. Таниқли инсайдер Фабрицио Романонинг маълум қилишича, манчестерликлар “ўрмончилар” етакчиларидан Морган Гиббс-Уайтга жиддий қизиқиш билдирмоқда.

“Шаҳарликлар” 25 ёшли футболчи трансферини ёзда амалга оширмоқчи. Бу ярим ҳимоячи 50 миллион еврога баҳоланмоқда. Талаб қилинаётган сумма манчестерликларни қониқтиради.

Гиббс-Уайт жорий мавсумда 34 та учрашувда иштирок этиб бешта гол ва тўққизта ассист қайд этди. Унинг “Ноттингем Форест” билан шартномаси 2027 йилнинг ярмигача амал қилади.