Mourino Portugaliya terma jamoasi hujumchisini "Roma"ga olib kelmoqchi

"Valensiya" klubi yarim himoyachisi Gonsalo Gedesh faoliyatini Italiya A Seriyasida davom ettirishi mumkin.

Todofichajes portali xabariga ko‘ra, 25 yoshli portugaliyalik futbolchiga “Roma” jiddiy qiziqib qolgan. Aniqrog‘i, u “bo‘rilar” ustozi Joze Mourinoning mavsumlar oralig‘idagi asosiy transfer nishoni hisoblanadi.

O‘z navbatida ispan klubi Gedeshni 35-40 million evroga baholamoqda. "Roma" va "Valensiya" klubi vakillari tez orada ushbu transfer masalasini muhokama qilish uchun uchrashishi kutilmoqda.

Gonsalu Gedesh joriy mavsum "Valensiya" safida La Ligada 33 ta o‘yinda maydonga tushdi va 11 ta gol urdi.