"Manchester Yunayted" Onanani Portugaliya terma jamoasi a’zosiga almashmoqchi

"Manchester Yunayted" Diogu Koshtani "Portu"dan sotib olib, Andre Onanani almashtirish variantini ko‘rib chiqmoqda.

"Correio da Manha" nashrining xabariga ko‘ra, mankunianliklardan tashqari futbolchiga boshqa bir Manchester klubi – "Siti" ham qiziqish bildirmoqda.

Joriy mavsumda Koshda barcha musobaqalarda 41 ta o‘yinda maydonga tushib, 44 ta gol o‘tkazib yuborgan. Shuningdek, u 18 ta o‘yinda darvozani "quruq" saqlashga muvaffaq bo‘lgan.

Dioguning "Portu" bilan amaldagi shartnomasi 2027-yilning 30-iyuniga qadar mo‘ljallangan. Uning transfer qiymati 38 million evroga baholanmoqda.

Eslatib o‘tamiz, Onana Evropa Ligasi chorak finalining birinchi o‘yinidan so‘ng asosiy tarkibdagi o‘rnini yo‘qota boshladi. "Lion"ga qarshi 2:2 hisobida yakunlangan uchrashuvda u ikkita qo‘pol xatoga yo‘l qo‘yib, gollar o‘tishiga sabab bo‘ldi. Garchi bosh murabbiy Ruben Amorim ommaviy tarzda uni qo‘llab-quvvatlagan bo‘lsa-da, Onana vaqtincha zaxiraga tushirilgan.