Луис Фернандес ПСЖ мухлисларини Микель Артетани қўллаб-қувватлашга чақирди

Хабарингиз бор, УЕФА Чемпионлар лигасининг ярим финалида Микель Артета бошчилигидаги "Арсенал" Луис Энрикенинг ПСЖcи билан куч синашади. Ушбу беллашувдан аввал парижликларнинг собиқ мураббийи Луис Фернандес лондонликлар мутахассиси ҳақида ўз фикрлари билан ўртоқлашди.

"Умид қиламанки, уни илиқ кутиб олишади ва Парижда ўзини қандай кўрсатгани учун унга меҳрибонлик қилишади. У клубга ҳурмат билан муносабатда бўлган, формани шараф билан кийган ва доим тўғри хулқ-атвор кўрсатган.

Шунинг учун мен "Парк-де-Пренс"га келадиган мухлислардан уни бақир-чақир билан қарши олмасликларини сўрайман. У албатта олқишларга лойиқ.

Албатта, улар "Арсенал"га қарши бақиришади, аммо Артетани муносиб тарзда қабул қилишларини истардим" — деди ПСЖнинг собиқ мураббийи.

Маълумот ўрнида, испаниялик мураббий футболчилик фаолияти давомида ПСЖ сафида 31 та учрашувда иштирок этишга улгурган.