Етти футболчи кетди!

Франция чемпионати иштирокчиси “Лилль” бу йилги мусобақа якунланганидан кейин жамоа таркибини етти нафар футболчи тарк этганини расман эълон қилди.

Унга кўра, жамоа ҳужумчилардан Чуба Акпом ва Жонатан Дэвид, ярим ҳимоячилардан Реми Кабелла, Анхель Гомес ва Митчел Баккер, ҳимоячи Самуэль Юмтити ва дарвозабон Вито Манноне билан хайрлашди.

- Йўлимиз айрилиши муносабати билан “Лилль” клуби кетаётган ўйинчиларни жамоага қўшган ҳиссаси учун миннатдорлик билдиради ва уларга фаолиятининг кейинги босқичида муваффақият тилайди.

Оқ йўл, жаноблар! Сизларнинг “Лилль”нинг катта уйида ҳар доим ўз жойингиз бўлади, - дейилади клубнинг расмий баёнотида.

“Лилль” жорий мавсумда 60 очко тўплаб, бешинчи ўринни эгаллади. Европа Чемпионлар лигасига йўлланма берувчи тўртинчи поғонадан жой олган “Ницца” ҳисобида ҳам шунча очко бор. Бу жамоа қўшимча кўрсаткичлар эвазига келаси мавсум қитъанинг энг нуфузли мусобақасида Франция шарафини ҳимоя қилади.