Элдор Сакаев: "Динамо" 2та вазиятдан 2та гол урди

Хабарингиз бор бундан бироз аввал Суперлиганинг 7-туридан ўрин олган “Андижон” ҳамда “Динамо” (2:2) учрашуви ўз якунига етди. Ўйиндан сўнг ўтказилган матбуот анжуманининг иккинчи қисмида мезбонлар устози Элдор Сакаев ўзининг ўйин ҳақидаги фикрларини билдириб ўтди.

“Уйда уч очко қўлга киритишимиз зарур эди. Бироқ, “Динамо” жамоасини ҳам кучсиз дея олмайман. Суперлигада кучсиз жамоа йўқ.

Бугун яратилган вазиятларнинг барчасини голга айлантира олмадик. Самарқандликлар эса 2та имкониятдан 2та гол уришди. Биз ҳимояда янада ишончлироқ ўйнашимиз лозим эди. Биз эса кераксиз вазиятларда хато қилдик ва голлар ўтказиб юбордик.

Биринчи бўлиб гол ўтказиб юборганимиз бироз руҳий таъсир ўтказди. Лекин, ҳисобда олдинга чиқиб олганимиздан сўнг ҳам тўпга эгалик қилишимиз ва ҳимояда ишончли ўйнашимиз керак эди. Аммо, буни яхши уддалай олмадик”, - дейди мураббий.