Эксперт ҳакамлар гуруҳи томонидан “Пахтакор” — “Нефтчи” учрашувидаги баҳсли вазиятлар бўйича маълумот!

Суперлиганинг 21-туридан ўрин олган “Пахтакор” — “Нефтчи” жамоалари ўртасидаги учрашувда бир нечта баҳсли ҳолатлар қайд этилди.

Ўйиннинг 23-дақиқасида “Пахтакор” жамоаси футболчиси тўп учун курашмаётган вазиятда рақиб ўйинчисининг юзига атайлаб, тирсаги билан тажовузкор тарзда зарба берди. Бош ҳакам ушбу ҳолат бўйича ВАР ҳаками ёрдамида тўғри қарор чиқариб, қоида бузган футболчига қизил карточка кўрсатган ҳолда майдондан четлатди.

Иккинчи ҳолат ўйиннинг 45+10-дақиқасида содир бўлди. Унда “Нефтчи” футболчиси тўпга эгалик қилиш учун курашаётган, тўпга ўйнаётган, рақиби томонига қўлини қўяётган пайтда “Пахтакор” футболчисининг юзига тегиб кетди. Ушбу вазият учун бош ҳакам “Нефтчи” футболчисига сариқ карточка кўрсатмай нотўғри қарор қабул қилди.

Ўйиннинг 45-дақиқасида “Пахтакор” футболчисига “Нефтчи” ҳимоячиси томонидан жарима майдончаси ичида қўполлик ишлатилди. Бу вазиятда “Нефтчи” футболчиси рақиби бошқа йўналишда ҳаракатланаётганига қарамай, оёғини кўтариб, қўпол тарзда ҳаракат қилди ва “Пахтакор” футболчисининг йиқилишига сабаб бўлди. Бош ҳакам бу ҳолатда тўғри қарор чиқариб, “Нефтчи” дарвозасига пенальти белгилади.