Dibala Shomurodovga qarshi o‘ynamoqchi

“Yuventus” hujumchisi Paulo Dibala jarohatidan sog‘ayib, safga qaytishga yaqin. Bu haqda Sportmediaset nashri xabar bermoqda.

Argentinalik futbolchi aynan jarohati tufayli Chempionlar ligasi guruh bosqichidan o‘rin olgan “Chelsi”ga qarshi va A Seriyaning “Torino”ga qarshi o‘yinlarini o‘tkazib yubordi. Ammo u 17 oktyabr kuni bo‘ladigan “Roma”ga qarshi o‘yinda ishtirok etishi mumkin.

Bundan tashqari, “Yuventus”ning Dibala bilan shartnomani uzaytirish bo‘yicha olib borayotgan muzokaralari ham ijobiy ketmoqda. Katta ehtimol bilan tomonlar amaldagi kelishuvni 2025 yilga qadar uzaytirishadi. Yangi shartnomaga ko‘ra, Dibalaning yillik maoshi 10 million evro bo‘ladi.

27 yoshli Dibala joriy mavsum A Seriyada jami 5 ta o‘yinda maydonga tushdi va o‘z hisobiga 2 ta gol hamda 2 ta golli uzatma yozdirib qo‘ydi.