Bunday himoyachi pro liga tugul, hatto Superligada ham yo‘q! Yil futbolchisi bo‘lishga nomzod haqida nimalarni bilasiz?

26 noyabr kuni O‘zbekiston futbol assotsiatsiyasi hamda professional futbol ligasi hamkorligida “Eng zo‘r-2022” taqdirlash marosimi o‘tkaziladi. Shu kuni O‘zbekiston futbolidagi yilning eng yaxshilari jamoatchilik guvohligida aniqlab olinadi.

Biz uchun ahamiyatli tomoni shundaki, pro ligada yil futbolchisi bo‘lish uchun 4 ta nomzod ilgari surilgan va ularning orasida “Andijon” jamoasi sardori Ildar Mamatkazin ham bor. Qolgan 3 ta futbolchilar – Ro‘zim Ahmedov (“Buxoro”), Roki Marchiano (“Xorazm”) va Humoyun Murtazoev (“Turon”). Qizig‘i, Mamatkazindan tashqari uchalasi hujumchi bo‘lib, ularning urgan gollari evaziga eng yaxshilar qatoriga kiritilganligi tabiiy hol. Birgina Mamatkazin himoyachi bo‘lishiga qaramay (aynan shunga ahamiyat qaratinglar!), yilning eng yaxshilari qatorida nomzodi ko‘rsatilgan. Bu albatta muhim va bunga to‘la munosib ham. Biz buni quyida faktlari bilan keltirib o‘tamiz.

Nomzodlar e’lon qilinganida kim nechta gol urgani va bu yil pro ligada nimaga erishgani haqida yozilgan. Hujumchi bo‘lganidan keyin o‘z-o‘zidan ularning ishi gol urish, shundaymi? Odatda himoyachilarning maydondagi ishlari unchalik ham ko‘zga tashlanavermaydi. Biroq bizning qahramonimiz hammani o‘ziga qarata oldi. Uning asosiy vazifasi birinchi navbatda mudofaa chizig‘ini mustahkamlash, raqiblariga gol urish imkoniyatini bermaslik, raqib hujumlarini zararsizlantirish. U mana shunday ishlarni qoyilmaqom bajarib, yana qo‘shimchasiga raqib jarima maydoni ichida eng xavfli o‘yinchilardan biriga aylana oldi. Buni urgan 7 ta goli bilan tasdiqlab turibdi. Tasavvur qiling, markaziy himoyachi chempionatda ko‘plab hujumchilar qila olmagan ishni uddaladi.

Shak-shubhasiz, Ildar “Andijon”ning Superligaga qaytishida o‘yini va gollari bilan ulkan hissa qo‘shdi va tom ma’noda “Andijon”ning etakchisiga aylandi. Bunday himoyachi pro liga tugul, hatto Superligada ham yo‘q! Statistikada ham shuni ko‘rsatib turibdiki, elitada ham biror-bir himoyachi Mamatkazin qilgan ishni bajara olmagan. U chindan ham noyob topilmaga aylandi. Ya’ni, 34 yoshida mana shunday yuqori darajada to‘p surgani uning o‘z ishiga mas’uliyat bilan yondashib, o‘ziga bildirilgan vazifani maksimal darajada uddalay olishini ko‘rsatib turibdi. Holbuki, bu yoshda va bo‘lib ham himoyada yana kim yuqori darajada o‘ynab, jamoasiga foyda keltira oladi? Mamatkazin ushbu mavsumda har tomonlama o‘zini ko‘rsatgan yagona himoyachiga aylandi!

Markaziy himoyachining bu mavsumda urgan gollariga e’tibor qarating:

6-tur. “Turon” – “Andijon” – 1:2. Mamatkazin, 90+5

12-tur. “Andijon” – Xorazm” – 2:1. Mamatkazin, 50.

17-tur. “Andijon” – “Sho‘rtan” – 2:1. Mamatkazin, 39.

18-tur. “Buxoro” – “Andijon” – 1:2. Mamatkazin, 30.

22-tur. “Xorazm” – “Andijon” – 0:1. Mamatkazin, 45.

23-tur. “Andijon” – “Turon” – 1:1. Mamatkazin, 71

27-tur. “Andijon” – “Xorazm” – 3:1. Mamatkazin, 69.

Ildar tomonidan urilgan gollar “Andijon”ga qanchalik foyda keltirganini ko‘rib turibsiz va “Burgutlar” raqiblaridan ochkolarni tortib olgan. Ayniqsa, qiyin pallarda futbolchi gollari bilan jamoasining joniga aro kirgan hamda o‘ta muhim, o‘ta qimmatli ochkolar qo‘lga kiritilishida katta hissasini qo‘shdi. Yuqoridagi jadvalda guvohi bo‘lganingizdek, himoyachi tomonidan kiritilgan gollar asosan “Andijon”ning g‘alabasi uchun xizmat qilgan. “Bobur Arena”da “Turon”ga qarshi bellashuvda bo‘lsa, Ildar o‘z goli bilan jamoasini mag‘lubiyatdan qutqarib qolgan. Qolaversa, himoyachi gollarini penaltidan emas, balki barchasini aynan o‘yin davomidagi o‘zining faolligi orqali kiritgan. U sardor sifatida bosh murabbiyning maydondagi chinakam yordamchisiga aylana oldi. Ayniqsa, “Andijon”ning oktyabr oyidayoq muddatidan ilgari pro ligada 1-o‘rinni naqd qilib, Superliga yo‘llanmasini qo‘lga kiritgani bejiz emas.

Yana bir gap: himoyachi gollar urishdan tashqari jamoadoshlariga golli paslar uzatishni ham unutib qo‘ymagan. Jumladan, O‘zbekiston Kubogi guruh bosqichida “So‘g‘diyona” va “Yangier”ga qarshi uchrashuvlarda Mamatkazin 3 marta assist vazifasini amalga oshirgan. Qolaversa, chempionat doirasida “Zomin” hamda “Turon”ga qarshi bahslarda ham jamoa sardori o‘z hisobiga bittadan assist yozib qo‘ygan.

Bu hali hammasi emas. Ildar Mamatkazin klub matbuot xizmati tomonidan o‘tkazib kelingan oyning eng yaxshi futbolchisi nominatsiyasida ikki marta – aprel va oktyabr oylarida tengsiz deb topildi. Chempionat yakunida esa 4500 muxlis qatnashgan so‘rovnomada eng ko‘p ovoz to‘plagan Mamatkazin “Andijon”ning 2022 yildagi eng yaxshi futbolchisi deb e’tirof etildi. Buning natijasida viloyat hokimi unga rag‘bat sifatida shahardan o‘ziga manzur keladigan kvartirani tanlab olish imkoniyatini taqdim etdi. 

Bir so‘z bilan aytganda, u barchasiga o‘z mehnati orqali erishyapti. Tan olish kerak, hozir futbolimizda bunga o‘xshagan “beton” va gollar urishni qoyillatadigan himoyachini topish amrimahol. Xullas 26 noyabr kuni eng yaxshilarni taqdirlash marosimida pro liganing ham eng yaxshi futbolchisi aniqlanadi. Shunday ekan, yuqorida keltirib o‘tilgan faktlar ham eng yaxshi o‘yinchi aniqlanishida inobatga olinishi darkor.  Ana endi o‘zingiz xulosa qilavering...