“Аякс” ўйинчилари “Манчестер Юнайтед”га кўчиб ўтмоқда

“Манчестер Юнайтед”га бош мураббий этиб тайинланган Эрик тен Хаг ёзги трансферлар очилиши билан “Аякс”даги шогирдларининг бир нечтасини янги клубига олиб ўтадиган кўринади.

Нидерландиялик мураббий янги иш жойидаги биринчи трансферларидан бири амстердамликлар вакили Юрриен Тимбер бўлишини таъкидалганди. Энди манчестерликлар 24 ёшли ҳимоячи Лисандро Мартинес трансферини ҳам амалга оширишига тўғри келмоқда.

Аргентиналик футболчи 2019 йилдан бери Нидерландия чемпионатида иштирок этиб келмоқда. Амстердамликлар уни 7 миллион еврога трансфер қилганди. Айни пайтда ҳимоячининг нархи кўтарилиб, 32 миллион еврони ташкил қиляпти.

Мартинес ҳимоя маркази, чап қанот ва таянч зонада ўйнай оладиган универсал футболчи ҳисобланади. Жорий мавсумда Нидерландия чемпионатида 24 та учрашувда битта гол уриб, учта голли пас узатди.