Зидан "Реал"ни тарк этгач қайси жамоани бошқаради? "Қироллик клуби"га ким мураббий бўлади? - Даврон Файзиевдан муносабат

Зинедин Зидан мавсум якунлангач, "Реал"ни тарк этиши борасида хабарлар кўпайди. Мураббийнинг Мадриддан кетиши ҳақида Испаниянинг номдор нашрлари бонг урмоқда. Ушбу маълумотларга таниқли шарҳловчи Даврон Файзиев телеграмдаги саҳифасида ўз муносабатини билдирди.

- Шунчаки гап-сўз эмас, ҳақиқатга айланиб бормоқда. "Реал Мадрид" мураббийликка Массимилиано Аллегрини таклиф этмоқчи. Зинедин Зидан кетади. Ҳали факт бўлмаса-да, анча нуфузли манбалар хабар қилишяпти. Ҳатто чемпион бўлса ҳам қолиш имкониятлари ёки нияти минимал даражада.

"Реал" март ойида биринчи бор Аллегри билан алоқага чиққан. Ҳозир музокаралар охирги босқичга етиб келган. Икки томоннинг якуний келишуви кутиляпти.

Мабодо нимадир бўлиб келишувга эришилмаса, Рауль бош мураббий бўлишга асосий даъвогар экан. Клуб афсонаси қачондир бошқарувни олади. Айнан ҳозир эртамасмикин... Тўғри, ўринбосарлар таркибида тажриба тўплади, ёшларнинг чемпионлар лигасини ютди. Пирло варианти бўлмайди, ҳар ҳолда. Дарвоқе "Ювентус" ҳақида. Зиданни айнан Туринда кутишмоқда. Мантиқан ҳаммаси тўғри. Расмий тасдиқни кутамиз, - деди Даврон Файзиев.