Суперлига. "Пахтакор" - "Навбаҳор": Жамоалар шу кунгача 70 марта ўзаро рўбарў келишган

Ўзбекистон Суперлигаси 3-турида "Пахтакор" - "Навбаҳор" беллашуви бўлиб ўтади.

Суперлига (олий лига)мизнинг мунтазам иштирокчиси бўлган мазкур клубларнинг ўзаро учрашувлари тарихига назар ташлайдиган бўлсак, жамоалар шу кунгача 70 марта ўзаро рўбарў келишган. 

Ўзаро ўйинлар бўйича устунлик пойтахтликлар тарафида. Ўтказилган баҳсларнинг 42 тасида “шерлар” зафар қучишган бўлса, 14 та ўйинда “лочинлар” ғалаба қозонишган, 14 та учрашувда эса дуранг қайд этилган. “Пахтакор” “Навбаҳор” дарвозасига 114 та тўп киритиб, ўз дарвозасидан 57 та тўп ўтказиб юборган. 

Ўзаро ўйинларда “шерлар” 140, “лочинлар” эса 56 очкони қўлга киритишган. Ушбу жамоаларнинг ўзаро ўйинлари тарихида қайд этилган энг йирик ҳисоб - 7:0. Мазкур ҳисоб 2009 йили Тошкентда бўлиб ўтган учрашувда қайд этилиб, унда “Пахтакор” зафар қучган. “Навбаҳор” эса 2024 йилги мавсумда ўз майдонида пойтахтликларни 5:2 ҳисобида мағлубиятга учратиб, “Пахтакор” билан ўзаро қарма-қаршиликдаги энг йирик ғалабасини нишонлади. 
Ушбу клублар шу кунгача Тошкентда 35 та ўйин ўтказган бўлиб, ушбу учрашувларнинг 28 тасида “шерлар” ғалаба қозонишган, 6 та ўйинда дуранг қайд этилган ва 1 та баҳсда “лочинлар” зафар қучишган. 

Пойтахтимизда бўлиб ўтган ўйинларда “Пахтакор” “Навбаҳор” дарвозасига 72 та гол уриб, ўз дарвозасидан 20 та тўп ўтказиб юборган. 

Эслатиб ўтамиз, “Пахтакор” – “Навбаҳор” жамоалари ўртасидаги ўйин 10 март куни соат 20:00 да “Пахтакор” стадионида бошланади.